قازاقستاندا جاڭا جاردەماقى ەنگىزۋ ۇسىنىلدى

دەپۋتاتتىڭ سوزىنشە، كەيبىرەۋلەردىڭ بەزبۇيرەكتىك تانىتۋىنان 2-جانە 3-توپتاعى كەمتار بالالاردى قولداۋ بولماي وتىر. ول دەپۋتاتتىق ساۋالىندا اقىل-ەسى كەم ازاماتتاردىڭ قامقورشىلارىنا بايلانىستى ماسەلەنى كوتەردى.

«ارەكەتكە قابىلەتسىز نەمەسە اقىل-ەسى كەم ادامداردىڭ قۇقىعىن قورعاۋدى زاڭدى وكىلى، ياعني 18 جاستان اسقاندا سوتپەن بەلگىلەنگەن قامقورشى قامتاماسىز ەتەدى. ءيا، 18 جاسقا دەيىن جاردەماقى بالاعا دا، قامقورشىعا دا تولەنەدى. ءبىراق ودان كەيىن دە ول - اناسى ءۇشىن ءبارىبىر بالا، ول 18 دەن اسقاسىن اقىل-ەسى دۇرىستالىپ، كەرەمەت بولىپ كەتپەيدى. ءاربىر انا بالاسى ءۇشىن تەگىن دە قاراي الادى، سوڭعى دەمى قالعانشا كۇتە دە الادى. الايدا جاردەماقى 2-، 3-توپتار قامقورشىلارىنا بەرىلمەيدى. پسيحيكالىق اۋرۋى بولسا، پسيحوتروپتىق ءدارى-دارمەگىن، كۇندەلىكتى قاجەت زاتتارىن، اس-سۋىن الۋعا بولىنگەن جاردەماقى جەتكىلىكسىز»، - دەدى ول.

تاڭساۋلە سەرىكوۆ وزىنە وسى تەكتەس وتىنىشتەردىڭ بىرنەشەۋى تۇسكەنىن مالىمدەدى.

«جالعىزباستى انا اۋىلدىق جەردە اقىل-ەسى كەم بالانى باعىپ، وعان قامقورشىلىق جاساپ وتىر. جاڭا ايتقانىمداي، قامقورشىعا ەشقانداي اقى تولەنبەيدى. ول بالانى قاسىندا قاراپ وتىرماسا، باسقا ادامدارعا زيانىن تيگىزۋى، ءۇيدى ورتەپ جىبەرۋى نەمەسە وزگە تۇگىلى وزىنە دە قاۋىپ ءتوندىرۋى ابدەن مۇمكىن. مىنە وسىنداي بالانى باقىلاپ، قامقورشى بولىپ وتىرعان انا ەشقانداي دا اقى المايدى. قارجى جەتىسپەۋشىلىگىنەن اناسى ءبىر جەرگە جالىنىپ، ەدەن جۋۋشى بولسا، ەكىنشى جەرگە ءوتىنىپ اۋلا سىپىرۋشى بولىپ، ەكى جۇمىس ىستەيدى ەكەن. ەدەن جۋۋشىنىڭ جالاقىسىن بالاسىنا ۋاقىتشا قاراپ وتىرعان ادامعا تولەسە، اۋلا سىپىرۋشىنىڭ 45 مىڭ ەڭبەك اقىسىنا بالاعا ءدارى-دارمەك الادى جانە قالاعا ەمگە بارىپ-كەلۋگە تاكسيگە 10 مىڭ تەڭگەدەن تولەيدى ەكەن»، - دەدى ول.

ءماجىلىس دەپۋتاتى اقىل-ەسىندە كەمشىلىگى بارلار، ونىڭ ىشىندە اۋتيزم، اليگروفەن، داۋن سيندرومىنا شالدىققاندار كوپ ەكەنىن جەتكىزدى.

«1-توپ مۇگەدەكتەرىنە جاردەماقى بەرىلگەنىمەن، 2-جانە 3-توپتاعىلار قالىس قالىپ وتىر. سوندىقتان مۇمكىندىگىنشە 1-توپقا وتكىزۋ كەرەك جانە 2، 3-توپ مۇگەدەكتەرىن ينۆاتساكسيمەن قامتاماسىز ەتۋ قاجەت»، - دەدى ول.

دەپۋتات بۇل باعىتتا مىناداي ۇسىنىس جاسادى:

1-توپتاعى اقىل-ەسى كەمشىلىگى بار مۇگەدەكتەر قامقورشىلارىنا 18 جاستان اسقان سوڭ دا ارنايى جاردەماقى بەلگىلەنسىن.

تۋعاننان اقىل-ەسى كەم بالالارعا بىردەن 1-توپ مۇگەدەكتىگى بەرىلسىن.

اقىل-ەسى كەمشىلىگى بار 2-3-توپ مۇگەدەكتەرىنە ارنايى ينۆاتاكسي قىزمەتىن بەلگىلەۋ.

دەنساۋلىق ساقتاۋ مينيسترلىگىنىڭ دەرەكتەرىنە سايكەس قازاقستاندا مىنەز-قۇلىق بۇزىلىستارى مەن پسيحيكالىق جاعدايى بار 200 مىڭعا تارتا ادام تىركەلگەن. پسيحولوگيالىق اۋىتقۋى بار ەرەسەكتەر سانى 2024-جىلى 1705 ادامعا وسكەن. اقىل-ەسى كەم بالالار سانى 3955 بالاعا ۇلعايعان. ياعني بۇگىندە 27286 بالا بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى