قازاقستاندا فورۋمدار مەن ءىس-شارالار سانى ازايا ما
. KAZINFORM – ق ر سىرتقى ىستەر مينيسترلىگى ەلىمىز قاتىساتىن جانە ەلدە وتەتىن فورۋمدار جانە باسقا دا ءىس-شارالاردى قىسقارتۋعا قاتىستى تۇسىنىك بەردى.
جۋىردا ۇكىمەت باسشىسى ەلىمىزدە وتكىزىلەتىن ءتۇرلى فورماتتاعى ءىس-شارالارعا جۇمسالاتىن شىعىنداردىڭ ازاياتىنى تۋرالى مالىمدەدى. وسى ورايدا بۇگىن سىرتقى ىستەر مينيسترلىگىندە وتكەن باسپا ءسوز ءماسليحاتىندا: «ۆەدومستۆو وتكىزەتىن جانە قاتىساتىن ءىس- شارالار سانى ازايا ما؟» دەگەن ساۋال قويىلدى.
«فورۋمدار مەن ءىس- شارالاردى تەك سىرتقى ىستەر مينيسترلىگى عانا ەمەس، بارلىق مەملەكەتتىك ورگاندار وتكىزەدى. ارينە، ءبىرىنشى كەزەكتە جوعارى باسشىلىقتىڭ تاپسىرمالارىن ورىندايتىن بولامىز جانە مۇمكىندىگىنشە وڭتايلاندىرامىز. الەمدەگى قازىرگى گەوساياسي جاعدايدى ەسكەرە وتىرىپ، ەلىمىز ءۇشىن سىرتقى ساياساتتىڭ ءرولى ارتىپ كەلەدى. ونىڭ ىشىندە ەكونوميكالىق احۋال، سانكتسيا ساياساتى جانە باسقا دا ساياسي پروتسەستەر تۋرالى ارىپتەستەرىمىزبەن كوبىرەك سويلەسۋىمىز كەرەك»، - دەپ جاۋاپ بەردى ايبەك سمادياروۆ.
ونىڭ ايتۋىنشا، حالىقارالىق ساياساتتا ۋاعدالاستىق كەرەك.
«سوندىقتان فورۋمدار مەن باسقا ءىس-شارالار سەبەپسىز وتكىزىلمەيدى. ونىڭ اياسىندا كوپتەگەن كەلىسىمگە قول جەتكىزىلەدى. كورىپ وتىرعانىڭىزداي، ءبىزدىڭ ەلگە بىردە-ءبىر سانكتسيا جوق، سونىڭ ءبارى كەلىسسوزدەردىڭ ناتيجەسى. سوندىقتان تۇسىنىستىكپەن قاراۋدى سۇرايمىز. ءبىز ءوز جۇمىسىمىزدى جوعارى دەڭگەيدە اتقارامىز»، - دەيدى ول.
