قازاقستاندا دەپوزيتتەر بويىنشا شەكتى مولشەرلەمە جويىلادى
استانا. KAZINFORM - ناۋرىزدان باستاپ قازاقستاننىڭ دەپوزيتتەرگە كەپىلدىك بەرۋ قورى شەكتى مولشەرلەمەلەردىڭ ءمانىن جاريالاۋدى توقتاتىپ، دەپوزيت نارىعىنداعى نارىق مولشەرلەمەلەرى تۋرالى مالىمەتتەردى جاريالاي باستايدى.
بۇل بانكتەر نارىقتاعى جاعدايعا قاراپ، سالىمدار بويىنشا سىياقى دەڭگەيىن ءوزى انىقتاي الاتىنىن بىلدىرەدى.
بۇعان دەيىن ق د ك ب ق بانكتەردىڭ دەپوزيتتەردى جاپپاي تارتۋىنا جول بەرمەۋ ءۇشىن ەڭ جوعارى مولشەرلەمەلەردى شەكتەگەن بولاتىن. الايدا بانك سەكتورى دامۋىنا بايلانىستى رەتتەۋشى قاتاڭ باقىلاۋدان باس تارتۋدى ۇيعارعان. 2024-جىلى كوپتەگەن بانك ءۇشىن شەكتى مولشەرلەمە الىپ تاستالدى. ەندى شەكتەۋلەر نارىقتىڭ بارلىق قاتىسۋشىسى ءۇشىن الىپ تاستالادى.
الايدا شەتەل ۆاليۋتاسىنداعى دەپوزيت بويىنشا شەكتى مولشەرلەمە بارل
«كەلەسى قادام: كاپيتالدانۋى تومەن بانكتەر ءۇشىن تەڭگەلىك دەپوزيتتەر بويىنشا شەكتى مولشەرلەمەلەردى جويۋ. 2025-جىلعى 1-ناۋرىزدان باستاپ ق د ك ب ق تەڭگەلىك دەپوزيتتەر بويىنشا شەكتى مولشەرلەمەلەردى بەلگىلەمەيدى. كاپيتالدانۋى تومەن بانكتەر دەپوزيتتىك ساياساتىن باسقا بانكتەر سەكىلدى نارىقتىق جاعدايعا ساي بەلگىلەيدى. سونىمەن بىرگە كاپيتالدانۋى تومەن بانكتەر دەپوزيتتەرى بويىنشا مولشەرلەمەلەردى ايتارلىقتاي وسىرەتىن بولسا (نارىقتاعى مولشەرلەمەگە قاراعاندا جوعارى+سپرەد)، بۇل بانك جۇيەسىنە قوسىمشا سالماق بولىپ تيەدى. وسىعان بايلانىستى مۇنداي بانكتەر مولشەرلەمەلەر شەكتەن تىس اسىرىلۋ دارەجەسىنە جانە دەپوزيتتەردى تارتۋ كولەمىنە قاراي كوتەرىڭكى جارنا تولەيدى»، - دەپ جازىلعان حابارلامادا.
جۇرگىزىلگەن رەفورما ناتيجەسىندە دەپوزيتتەر بويىنشا سىياقى مولشەرلەمەلەرىن بەلگىلەۋ كەزىندە بانكتەرگە مەيلىنشە ەركىندىك بەرىلەدى دەپ جوسپارلانىپ وتىر.
«بۇل بانكتەر اراسىندا ادال باسەكەلەستىك دامۋىنا جاعداي جاسايدى جانە بولشەك ساۋدالىق دەپوزيت نارىعىنىڭ، اسىرەسە، ساناۋلى بانكتەر عانا قاتىساتىن سەگمەنتتىڭ دامۋىنا جاڭا سەرپىن بەرەدى. ايتالىق، قازىر مەرزىمى 12 ايدان اساتىن مەرزىمدى جانە جيناق سالىمداردى تارتۋ كولەمى ماردىمسىز، ءبىراق كوبەيتۋگە الەۋەت جەتكىلىكتى»، - دەيدى ق د ك ب ق باسشىسى ءادىل وتەمبايەۆ.
بۇل نەنى بىلدىرەدى؟
بۇل سالىمشىلارعا دەپوزيت تاڭداۋدا كوپ مۇمكىندىك اشۋى مۇمكىن. كەيبىر بانكتەر جوعارى پايىزبەن مولشەرلەمە ۇسىنسا، كەيبىرەۋلەرى تۇراقتى شارتتاردى ساقتاۋعا تىرىسادى. الايدا ەندى مولشەرلەمە ەكونوميكالىق جاعدايعا بايلانىستى بۇرىنعىدان تەز وزگەرۋى مۇمكىن: ءوسۋى دە، تومەندەۋى دە ىقتيمال.
مولشەرلەمە كۇرت وسۋىنە جول بەرمەۋ ءۇشىن ق د ك ب ق باقىلاۋ مەحانيزمدەرىن ساقتاپ قالدى. ورتاشا دەڭگەيدەن ايتارلىقتاي اسىپ كەتكەن بانكتەر قوسىمشا تولەم جاساۋعا مىندەتتەلەدى.
