قازاقستاندا دەنە شىنىقتىرۋ پانىنەن ءدارىس بەرەتىن قانشا مامان بار

اتالعان ۆەدمستۆو ستاتيستيكالىق مالىمەتتەرگە سۇيەنە وتىرىپ، قازىرگى تاڭدا ەلىمىزدە دەنە شىنىقتىرۋ جانە سپورت ساباقتارىن 67755 شتاتتىق قىزمەتكەر وتكىزەتىنىن اتاپ ءوتتى. بۇل - 2022 -جىلمەن سالىستىرعاندا 1433 ادامعا كوپ.

اۋىلدىق جەرلەردە 31329 دەنە شىنىقتىرۋ قىزمەتكەرى جۇمىس ىستەيدى (2022 -جىلى - 29796 ادام).

بۇعان دەيىنگى ەسەپتى كەزەڭدەگى دەرەكتەرگە سايكەس، كەي وڭىرلەردە شتاتتىق قىزمەتكەرلەردىڭ سانى ارتقانى بايقالادى. دەنە شىنىقتىرۋ سالاسىنىڭ شتاتتىق قىزمەتكەرلەرىنىڭ سانى ارتۋى بويىنشا الماتى (595)، اتىراۋ (222)، جەتىسۋ (129) جانە پاۆلودار وبلىستارى (112) كوش باستاپ كەلەدى.

رەسپۋبليكا بويىنشا 10 مىڭنان اسا جالپى ءبىلىم بەرۋ ۇيىمدارى بار، وندا 32 مىڭنان استام دەنە شىنىقتىرۋ سالاسىنىڭ وقىتۋشى- مۇعالىمدەرى ەڭبەك ەتەدى. ونىڭ ىشىندە اۋىلدى جەرلەردە 19 مىڭنان استام ادام جۇمىس ىستەيدى.

بۇدان بولەك، ءبىلىم بەرۋ جانە سپورت مەكەمەلەرىندە سپورت باعىتىن دامىتۋ ءۇشىن 15 مىڭنان اسا جاتتىقتىرۋشى- وقىتۋشى جۇمىس ىستەيدى، ونىڭ ىشىندە اۋىلدا 5 مىڭنان اسا جاتتىقتىرۋشى شاكىرتتەرىن تاربيەلەۋگە، وقىتۋعا جانە شەبەرلىكتەرىن شىڭداۋعا، فۋنكتسيونالدىق مۇمكىندىكتەرىن دامىتۋعا باعىتتالعان وقۋ-جاتتىعۋ جۇمىسىن جۇرگىزىپ، سپورتشىلاردى جاڭا جەتىستىكتەرگە جەتۋگە ىنتالاندىرادى.

سونىمەن قاتار بۇعان دەيىنگى ەسەپتى كەزەڭمەن سالىستىرعاندا جاتتىقتىرۋشى- وقىتۋشىلار سانى 321 ادامعا ارتقان. 2023 -جىلى 13 وڭىردە وڭ ديناميكا تىركەلگەن. اتاپ ايتقاندا، ەڭ ۇلكەن ءوسىم الماتى (318)، اتىراۋ (142) جانە جەتىسۋ وبلىستارىندا (122) بايقالادى.

«قازىرگى قوعامدا بۇقارالىق سپورتتى دامىتۋ باستى مىندەتتەردىڭ ءبىرى. دەنى ساۋ ۇلتتى قالىپتاستىرۋ ءۇشىن سپورت ينفراقۇرىلىمىن دامىتىپ قانا قويماي، دەنە شىنىقتىرۋ جانە سپورت سالاسىنىڭ قىزمەتكەرلەرىن كادرلىق رەسۋرستارمەن قامتاماسىز ەتۋ ارقىلى سپورتتىڭ قولجەتىمدىلىگىن ارتتىرۋ قاجەت. جوعارى جەتىستىكتەر سپورتىنىڭ بارلىق ناتيجەسى بۇقارالىق جانە بالالار سپورتىنىڭ دامۋىنا تىكەلەي بايلانىستى. ءبىز دەنە شىنىقتىرۋدى ناسيحاتتاۋ، سونداي-اق سپورتتىڭ قولجەتىمدىلىگىن ارتتىرۋ بويىنشا ۇلكەن جۇمىس اتقارىپ جاتىرمىز، جاقىن ارادا بۇل جۇمىس قارقىندى تۇردە جالعاساتىن بولادى»، - دەدى تۋريزم جانە سپورت ءمينيسترىنىڭ ورىنباسارى سەرىك جاراسبايەۆ.

اۆتور

كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى