قازاقستاندا ءىرى ەكسپورتتاۋشىلاردىڭ قىزمەتىن قاداعالاۋ كۇشەيتىلمەك
بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ترانسفەرتتىك باعا بەلگىلەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى، دەپ حابارلايدى Kazinform.
قارجى ۆيتسە-ءمينيسترى ەرجان ءبىرجانوۆتىڭ ايتۋىنشا، 2008-جىلدان باستاپ بۇل زاڭناماعا كونتسەپتۋالدى وزگەرىستەر ەنگىزىلمەگەن ەدى، ياعني 15 جىلداي ەلەۋلى وزگەرىس بولمادى. 2017-جىلى رەداكسيالىق تۇردە ءبىرشاما تۇزەتۋ بولعان.
«بۇل زاڭناما قازاقستاننان شىققان باستاپقى ەكسپورتتىق تاۋارلاردىڭ قانشالىقتى نارىقتىق باعامەن شىعىپ جاتقانىن قاداعالاۋعا باعىتتالعان. ياعني وسى تۇرعىدا بۇل ەكسپورتتان سالىقتىڭ تولىققاندى ءتۇسۋى ماسەلەسىن رەتتەيدى. سوندىقتان بۇگىنگى تانىستىرىلعان زاڭ جوباسى اياسىندا كونتسەپتۋالدى وزگەرىستەر ەنگىزىلىپ جاتىر»، - دەدى ۆيتسە-مينيستر.
ونىڭ سوزىنە قاراعاندا، ءتيىستى تۇزەتۋلەردى قامتىپ تۇرعان وسى زاڭ قابىلدانسا، بيۋجەتكە قوسىمشا سالىق تۇسەدى.
«اتاپ ايتقاندا، وسىعان دەيىن مۇناي، مەتالل جانە باسقا دا تاۋارلاردى شىعاراتىن كومپانيالار ءتۇرلى سحەمالاردى قولدانىپ كەلگەن ەدى. ولاردى تەكسەرۋ كەزىندە انىقتالعان دەرەكتەردى ەسكەرە وتىرىپ، ءتيىستى وزگەرىستەردى ەنگىزىپ جاتىرمىز. بۇل زاڭ جوباسىنىڭ نورمالارى قاراپايىم ادامدارعا، شاعىن جانە ورتا بيزنەسكە ەشقانداي اسەر ەتپەيدى. وزگەرىستەر ەكسپورتقا باعدارلانعان الپاۋىت مەكەمەلەرگە ارنالعان. سولاردىڭ ەكسپورتقا شىعارعان تاۋارلارى بويىنشا ناقتى سالىقتى ءوندىرىپ الۋعا باعىتتالعان»، - دەدى ە. ءبىرجانوۆ.
