قازاقستاندا ءدارى-دارمەكتى تاڭبالاۋ قالاي ءجۇرىپ جاتىر

- اتاپ ايتقاندا، نورماتيۆتىك قۇقىقتىق بازا دايىندالىپ، تاڭبالاۋدىڭ بيزنەس-پروتسەستەرى سىنالدى. ياعني قاتىسۋشىنى تىركەۋ، دارىلىك زاتتاردى ۇلتتىق كاتالوگتا تىركەۋ، تاڭبالاۋ كودتارىنىڭ ەميسسياسى، ەلدىڭ وندىرىستىك الاڭدارىندا تاڭبالاۋ كودتارىن تىكەلەي قولدانۋ تاسىلىمەن دارىلىك زاتتاردى ءبىر مەنشىك يەسىنەن ەكىنشىسىنە بەرۋ، اينالىمنان شىعارۋ جۇمىستارى پيلوتتىق جوبادا قامتىلدى، - دەلىنگەن دەنساۋلىق ساقتاۋ مينيسترلىگى Kazinform ساۋالىنا جولداعان جاۋاپتا.

ۆەدومستۆودان ءمالىم ەتكەندەي، جوباعا وتاندىق جانە شەتەلدىك وندىرۋشىلەر، س ك- فارماتسيا ج ش س، ديستريبيۋتورلار، مەديتسينالىق ۇيىمدار، جالپى 23 ۇيىم قاتىستى.

پيلوتتىق باعدارلاما اياسىندا DataMatrix دارىلىك زاتىنىڭ قاپتاماسىنا سالىنعان كودتىڭ كومەگىمەن وندىرۋشىدەن مەديتسينالىق جانە ءدارىحانا ۇيىمدارىندا اينالىمنان شىعارۋعا دەيىنگى قاداعالاۋ پروتسەسى تەكسەرىلدى.

- دارىلىك زاتتاردى سيفرلىق تاڭبالاۋ جانە قاداعالاۋ جۇيەسى دارىلىك زاتتاردىڭ اينالىمىن اناعۇرلىم ايقىن ەتەدى جانە كونترافاكتىلىك ونىمدەردىڭ اينالىمىنان قورعاۋدىڭ نەگىزگى قۇرالدارىنىڭ ءبىرى. POS- تەرمينالدار كومەگىمەن سكانەرلەۋگە بولادى. ءاربىر دارىلىك زاتتىڭ قاپتاماسىندا بىرەگەي Data Matrix سيفرلىق كودتارى بار. بۇل ساتىپ الىناتىن پرەپاراتتىڭ ورگينينال ەكەنىن تەكسەرۋگە مۇمكىندىك بەرەدى. قازىر تاۋارلاردى تاڭبالاۋ مەن قاداعالاۋدىڭ اقپاراتتىق جۇيەسىندە 19 وتاندىق تاۋار ءوندىرۋشى، 276 كوتەرمە ساتۋ سۋبەكتىسى، بولشەك ساۋدادا وتكىزۋدىڭ 3172 سۋبەكتىسى، م ءا م س جانە تمككك شەڭبەرىندە قىزمەتتى جۇزەگە اسىراتىن 19001 مەديتسينا مەكەمەسى تىركەلگەن، - دەلىنگەن حابارلامادا.

ەسكە سالا كەتسەك، ەلىمىزدە بارلىق ءدارى-دارمەكتى مىندەتتى سيفرلىق تاڭبالاۋ 2024-جىلدىڭ 1-شىلدەسىندە ەنگىزىلدى.

اتالعان شارا كونترافاكتىلىك ونىمدەرمەن كۇرەسۋگە جانە ءدارى-دارمەك نارىعىنىڭ اشىقتىعىن ارتتىرۋعا باعىتتالعان.

بۇعان دەيىن ءدارى-دارمەكتى قانشالىقتى زاڭدى جولمەن جاسالعانىن تەكسەرەتىن قوسىمشا ىسكە قوسىلعانىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى