قازاقستاندا ءبىر بولكە ناننىڭ باعاسى قانشا بولۋعا ءتيىس؟
استانا. KAZINFORM - قازاقستاندا ءبىر بولكە ناننىڭ باعاسى قانشا بولۋى كەرەك دەگەن سۇراققا ساۋدا جانە ينتەگراتسيا مينيسترلىگىنىڭ باسپا ءسوز قىزمەتى جاۋاپ بەردى.
مينيسترلىك مالىمەتىنشە، الەۋمەتتىك ماڭىزى بار ازىق-تۇلىك باعاسى نارىقتىق جاعدايعا بايلانىستى وزگەرىپ وتىرادى. الايدا ۆەدومستۆو باعانىڭ نەگىزسىز ءوسۋىن بولدىرماۋعا كۇش سالاتىنىن جەتكىزدى.
«ورتاشا نارىقتىق باعالار ۇلتتىق ستاتيستيكا بيۋروسىنىڭ مالىمەتتەرىنە سۇيەنە وتىرىپ انىقتالادى. ءبىز سول ورتاشا باعادان %15 دان ارتىق قوسىلماۋىن قاداعالايمىز. بۇل رەتتە باعانى تۇراقتاندىرۋ ءۇشىن جەرگىلىكتى جارمەڭكەلەر ۇيىمداستىرىپ، ارنايى شارالار قابىلدايمىز»، - دەپ مالىمدەدى مينيسترلىك وكىلدەرى.
مينيسترلىك وكىلدەرى اتاپ وتكەندەي، جارمەڭكەلەردە ونىمدەر دەلدالسىز ساتىلاتىندىقتان، باعانىڭ قولجەتىمدى بولۋىنا مۇمكىندىك بار. سونىمەن قاتار تۇراقتاندىرۋ قورلارى مەن فورۆاردتىق ساتىپ الۋ باعدارلامالارى ارقىلى ناننىڭ باعاسىن تۇراقتى دەڭگەيدە ۇستاۋ ءۇشىن شارالار قولعا الىنۋدا.
ءبىر بولكە نان قانشا تۇرادى؟
قازىرگى تاڭدا قازاقستاندا ناننىڭ باعاسى ءار وڭىردە ءارتۇرلى. ورتاشا باعالار تۋرالى اقپاراتتى ۇلتتىق ستاتيستيكا بيۋروسىنىڭ رەسمي سايتىنان كورۋگە بولادى.
مينيسترلىك نان باعاسى مەن باسقا دا الەۋمەتتىك ماڭىزى بار ازىق-تۇلىك ونىمدەرىنىڭ قۇنىن باقىلاۋ جۇمىستارىن جالعاستىراتىنىن ايتتى.
