قازاقستاندا بيىل سالىناتىن جولدار بەلگىلى بولدى

- مەملەكەت باسشىسىنىڭ ۇلتتىق قۇرىلتايدا بەرگەن تاپسىرماسىنا سايكەس، 2024-جىلى 12 مىڭ شاقىرىم تاسجولدى جوندەۋ جانە قايتا جاڭارتۋ جۇمىستارىمەن قامتۋ جوسپارلانعان. بۇگىنگى كۇنى 7,2 مىڭ شاقىرىمعا جۋىق جولدارداعى جۇمىستار اياقتالدى. ونىڭ ىشىندە قۇرىلىس جانە قايتا جاڭارتۋ بويىنشا 3,1 مىڭ شاقىرىم (2,2 مىڭ شاقىرىمى اياقتالدى)، رەسپۋبليكالىق جەلىنى كۇردەلى جانە ورتاشا جوندەۋ بويىنشا 4,9 مىڭ شاقىرىم (1,5 مىڭ شاقىرىمى اياقتالدى)، جەرگىلىكتى جەلىنى جوندەۋ بويىنشا 4,3 مىڭ شاقىرىم (3,6 مىڭ شاقىرىمى اياقتالدى) قامتىلدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

قازىرگى كەزدە اۆتوجولداردىڭ جالپى ۇزىندىعى 95 مىڭ شاقىرىمدى قۇرايدى، ونىڭ 25 مىڭ شاقىرىمى رەسپۋبليكالىق جەلىگە قاراستى بولسا، قالعان 70 مىڭ شاقىرىمى جەرگىلىكتى جەلىگە جاتادى. جەرگىلىكتى جەلىنى دامىتۋ بويىنشا 2029 -جىلعا دەيىن كەمىندە 14 مىڭ شاقىرىم جەرگىلىكتى جولداردى قايتا جاڭارتۋ جانە جوندەۋ جۇمىستارى اتقارىلادى.

- 2025-2030-جىلدار ارالىعىندا جالپى ۇزىندىعى 4,7 مىڭ شاقىرىمدى قۇرايتىن (3,7 مىڭ شاقىرىم - I سانات، 1 مىڭ شاقىرىم - II سانات) جاڭا جوبالاردى كەزەڭ-كەزەڭىمەن ىسكە اسىرۋدى باستاۋ جوسپارلانعان، - دەپ اتالىپ وتكەن ۆەدومستۆو اقپاراتىندا.

اتاپ ايتقاندا، 2025-جىلى «قىزىلوردا - جەزقازعان» (208 ش ق)، «اقتوبە - ۇلعايسىن» (234 ش ق)، «قاراعاندى - جەزقازعان» (572 ش ق)، «سارىاعاش قالاسىن اينالىپ ءوتۋ» (102 ش ق)، «قىزىلوردا قالاسىن اينالىپ ءوتۋ» (20 ش ق)، « قىزىلوردا - سەكسەۋىل» (470 ش ق)، «اتىراۋ - دوسسور» (86 ش ق)، «رۋدنىي قالاسىن اينالىپ ءوتۋ» (16,9 ش ق)، «جاڭاوزەن - كەندىرلى» (156 ش ق)، «پەتروپاۆل قالاسىن اينالىپ ءوتۋ» (8 ش ق)، «تۇركىستان قالاسىن اينالىپ ءوتۋ» (29,6 ش ق)، «استانا - قوستاناي – ر ف شەكاراسى» (830 ش ق)، «شىمكەنت قالاسىن اينالىپ ءوتۋ» (48 ش ق)، «اتىراۋ - ورال» (ورتاشا جوندەۋ) (516 ش ق)، «اتىراۋ - چاپاي» (136 ش ق) «الماتى - تالعار - بايدىبەك ءبي» (68 ش ق)، «الماتى - ءۇشقوڭىر» (48 ش ق)، «بەينەۋ - سەكسەۋىل» (736 ش ق)، «ورال كوپىرى» (6,5 ش ق) سىندى جوبالاردى ىسكە اسىرۋدى باستاۋ قاراستىرىلعان.

بۇل تۇرعىدا پەرسپەكتيۆالى جوبالاردى جۇزەگە اسىرۋ ءۇشىن قازىر ينۆەستيتسيا تارتۋ ماسەلەلەرى پىسىقتالىپ جاتىر.

ەسكە سالساق، جاقىندا ۇكىمەت باسشىسى ولجاس بەكتەنوۆ باتىس قازاقستان وبلىسىندا جول سالاسىندا اتقارىلعان جۇمىستى سىنعا الدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى