قازاقستاندا بىلتىر ءسۇت بەزى وبىرىنان 1 مىڭنان استام ايەل كوز جۇمعان
استانا. KAZINFORM - دەنساۋلىق ساقتاۋ مينيسترلىگى ءسۇت بەزى وبىرىن انىقتاۋ ءۇشىن ايەلدەردى ۋاقتىلى سكرينينگتەن وتۋگە شاقىردى. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.
ءسۇت بەزى وبىرى بۇگىندە قازاقستاندا عانا ەمەس، بۇكىل الەمدە ونكولوگيالىق اۋرۋلاردىڭ ەڭ كوپ تارالعان تۇرلەرىنىڭ ءبىرى بولىپ سانالادى.
د د س ۇ دەرەكتەرى بويىنشا، بۇل وبىر قاتەرلى ىسىك دياگنوزدارىنىڭ %21 ىن قۇرايدى. الەمدىك ستاتيستيكاعا سايكەس جەر شارىنداعى ءاربىر سەگىزىنشى ايەل ءسۇت بەزى وبىرىمەن اۋىرادى.
ايەلدەردىڭ وسى قاۋىپتى اۋرۋ تۋرالى حاباردار بولۋى ءۇشىن جىل سايىن 15-قازاندا دۇنيەجۇزىلىك ءسۇت بەزى وبىرىمەن كۇرەس كۇنى اتاپ وتىلەدى.
قازاقستاندا تەك 2023-جىلى ءسۇت بەزى وبىرىنىڭ 5,5 مىڭنان استام جاڭا جاعدايى انىقتالدى. ءبىر جىلدىڭ ىشىندە بۇل اۋرۋدان 1 مىڭنان استام ايەل كوز جۇمعان. سونىمەن قاتار، ءسۇت بەزى وبىرىن ەرتە كەزەڭدە ۋاقتىلى دياگنوستيكالاۋ كەزىندە ايەلدەردىڭ تولىق ەمدەلۋى %95 عا جەتەدى، - دەلىنگەن مينيسترلىك حابارلاماسىندا.
بۇل اۋرۋدىڭ پروفيلاكتيكاسى جانە ەرتە دياگنوستيكالاۋ ماقساتىندا 40 پەن 70 جاس ارالىعىنداعى ءاربىر ايەل 2 جىلدا 1 رەت ءسۇت بەزى وبىرىنا ماممولوگيالىق سكرينينگتەن ءوتۋى كەرەك.
م ءا م س شەڭبەرىندە تەگىن ونكوسكرينينگتى تىركەلگەن جەرى بويىنشا ەمحانالاردان وتۋگە بولادى.
بۇعان دەيىن، قىركۇيەكتە رەسپۋبليكادا ءجىتى رەسپيراتورلىق ۆيرۋستىق ينفەكتسيانىڭ 544 مىڭنان استام جاعدايى تىركەلگەنى حابارلاندى.
سونداي-اق، جوسپارلى گوسپيتاليزاتسياعا دايىندىق جەڭىلدەتىلگەنى انىقتالدى.
