قازاقستاندا ايەلدەر كوپ پە، ەرلەر كوپ پە
قازاقستانداعى ايەلدەر سانى ەرلەر سانىنان بۇرىنعىداي باسىم، دەپ حابارلايدى Kazinform. 2021 -جىلعى ساناق قورىتىندىسى بويىنشا ولاردىڭ سانى جارتى ميلليونعا (536,3 مىڭ ادامعا) ارتىق بولدى. پايىزبەن ايتساق، ەرلەر ۇلەسى - 48,6 پايىز (9324840 ادام)، ايەلدەردىكى - 51,4 پايىز (9861175 ادام). الدىڭعى ساناقپەن سالىستىرعاندا ەرلەر سانى 1,6 ميلليون، ايەلدەر سانى 1,5 ميلليون ارتتى، قازاقستاندا 1000 ايەلگە 946 ەردەن كەلەدى.
«دەموگرافيا ەرەكشەلىكتەرىنە بايلانىستى 36 جاسقا دەيىنگى ەر ادامدار سانى ايەلدەرگە قاراعاندا كوپ، سودان كەيىن عانا ولاردىڭ سانى اراقاتىناسقا سالعاندا ازايا باستايدى (36 جاستان اسقان ايەلدەر سانى 736 مىڭ ادامعا كوپ). بۇل رەتتە ەرلەر مەن ايەلدەردىڭ اراقاتىناسى تەك ەكى وڭىردە - قىزىلوردا جانە تۇركىستان وبلىستارىندا كوپ، وندا 1000 ايەلگە سايكەسىنشە 1006 جانە 1027 ەر ادامنان كەلەدى.
الدىڭعى ساناققا قاراعاندا 15-19 جاس جانە 20-24 جاس ارالىعىنداعى ايەلدەر مەن ەرلەردىڭ سانى ازايعانىنا نازار اۋدارۋعا بولادى. بۇل 2009 -جىلعى حالىق ساناعى كەزىندە 20-24 جاس ارالىعىنداعى توپتا تۋۋدىڭ ەڭ جوعارى كەزەڭىندە - 1980 -جىلداردىڭ ەكىنشى جارتىسىندا تۋىلعان ۇرپاقتىڭ بولۋىمەن بايلانىستى»، - دەپ جازدى ۇلتتىق ستاتيستيكا بيۋروسىنان.
ال 2021 -جىلى بۇل جاس توبىن 1990-جىلداردىڭ اياعى مەن 2000-جىلداردىڭ باسىندا دۇنيەگە كەلگەن تۋۋ كورسەتكىشى تومەن بولعان ۇرپاق الماستىردى. سول سياقتى 15-19 جاس ساناتى بويىنشا 2002-2006 -جىلى تۋعان ۇرپاق 1990-جىلداردىڭ ءبىرىنشى جارتىسىنداعى ۇرپاققا قاراعاندا از.
2009 -جىلعى ساناقپەن سالىستىرعاندا 55-59، 60-64 جانە 65-69 جاستاعى ەر ادامدار سانى سايكەسىنشە 50,2 پايىز، 117 پايىز جانە 69,5 پايىز ايتارلىقتاي ءوستى. وسى جاستاعى ايەلدەر سانى دا 2009 عا قاراعاندا سايكەسىنشە 38 پايىز، 105,9 پايىز جانە 58,3 پايىز وسكەن. اتالعان جاس توبىنداعى حالىقتىڭ ءوسۋى ورتاشا ءومىر ءسۇرۋ ۇزاقتىعىنىڭ ارتۋىمەن، ءومىر ءسۇرۋ جاعدايلارىنىڭ جاقسارۋىمەن بايلانىستى.
