قازاقستاندا اسكەرگە بارعان قىزدار بار ما؟ مينيستر جاۋاپ بەردى
قورعانىس ءمينيسترى رۋسلان جاقسىلىقوۆ قىزداردىڭ اسكەرگە بارۋىنا قاتىستى سۇراققا جاۋاپ بەردى. مينيستر ايەلدەرگە قاتىستى بولەك كاتەگوريا بارىن ايتتى.
«كەلىسىمشارت بويىنشا اسكەري قىزمەتتەگى ايەلدەر بار. ولار ءبىرىنشى كەزەكتە مەديتسينا قىزمەتكەرلەرىن، بايلانىسشىلاردى، راديوتەلەگرافيستەردى، ءىس قاعازدارىن جۇرگىزۋدى، قارجى قىزمەتكەرلەرىن الماستىرادى. ءبىز قاجەت جاعدايدى جاسايمىز. ءبىراق ەگەر ەر ادامدار 18 جاستان باستاپ شاقىرىلا باستاسا، وندا ايەلدەرگە 19 جاستان باستاپ العاشقى قىزمەت مەرزىمىن انىقتايمىز. سەبەبى ول العاشقى ءبىلىم الۋى كەرەك.
بۇگىنگى كۇنى ءبىز قىزداردى مەرزىمدى قىزمەتكە شاقىرۋ ماسەلەسىن قاراستىرمايمىز. وفيتسەرلەر، ەڭ الدىمەن، دارىگەرلەر جانە باسقا باعىتتار بويىنشا عانا شاقىرىلادى»، - دەيدى مينيستر.
جاقسىلىقوۆتىڭ سوزىنشە، بيىل 20 قىز اقتوبەدەگى اۆياتسيا ينستيتۋتىنا ءتۇسىپ، اسكەري مەديتسينا فاكۋلتەتىندە ءبىلىم الىپ جاتىر.
«ولار دۋالدى ءبىلىم الىپ جاتىر. ءبىراق سوعىس جانە قاۋىپ تونگەن جاعدايدا گەندەرلىك ايىرماشىلىققا قارامايمىز»، - دەيدى رۋسلان جاقسىلىقوۆ.
