قازاقستاندا التىنعا ينۆەستيتسيا سالۋدىڭ جاڭا ءتاسىلى پايدا بولدى
استانا. KAZINFORM - قازاقستاندا ەندى Gold Coin اتاۋىمەن سيفرلىق فورماتتاعى ينۆەستيتسيالىق التىننىڭ سيفرلىق بالاماسى ىسكە قوسىلدى. بۇل تۋرالى ق ر ۇلتتىق بانكى ءمالىم ەتتى.
قازاقستاندا التىنعا ينۆەستيتسيا سالۋدىڭ جاڭا، ىڭعايلى ءتاسىلى پايدا بولدى. ۇلتتىق بانك Gold Coin - UKI ينۆەستيتسيالىق مونەتاسىنىڭ سيفرلىق بالاماسىن ىسكە قوستى. بۇل مونەتا ا ح ق و (AIX) بيرجاسىندا ساۋدالانا باستالدى.
ول قالاي جۇمىس ىستەيدى؟
Tabys قوسىمشاسىنان Gold Coin - ينۆەستيتسيالىق التىننىڭ سيفرلىق بالاماسىن ساتىپ الۋعا بولادى.
1Gold Coin = 1/20 تروي ۋنتسياسى التىنعا تەڭ.
باعاسى LBMA الەمدىك كوتيروۆكالارى مەن دوللاردىڭ تەڭگەگە شاققانداعى باعامىنا نەگىزدەلەدى.
Gold Coin-دى ونلاين ساتىپ الۋعا، ساتۋعا جانە سىيعا تارتۋعا بولادى.
20 Gold Coin جيناساڭىز، ولاردى ۇلتتىق بانكتىڭ فيليالدارىندا فيزيكالىق UKI مونەتاسىنا ايىرباستاۋعا بولادى.
- بۇل جوبانىڭ بىرەگەيلىگى سول - ەندى ينۆەستورلار التىن ينۆەستيتسيالىق مونەتالاردى ۇلتتىق ۆاليۋتادا قالاي ساتىپ الىپ، قالاي ساقتايتىنىن وزدەرى تاڭداي الادى. ياعني، سيفرلىق جانە فيزيكالىق فورمات قاتار قولجەتىمدى بولادى. بۇل باستاما التىنعا ينۆەستيتسيا سالعىسى كەلەتىندەرگە وتە ىڭعايلى جاعداي جاسايدى، - دەيدى ۇلتتىق بانكتىڭ قولما-قول اقشا اينالىسى باسقارماسى ديرەكتورىنىڭ ورىنباسارى انۋار كونيركۋلجايەۆ.
ەسكە سالا كەتەيىك، بۇعان دەيىن ۇلتتىق بانك اقشا-كرەديت ساياساتى تۋرالى باياندامانى جاريالاعانىن جازعان بولاتىنبىز.
