قازاقستاندا اللەرگياسى بار ناۋقاستار كوبەيدى
استانا. KAZINFORM - قازاقستاندىقتاردىڭ 40 پايىزى وسى دەرتكە شالدىققان. جالپى، سوڭعى جىلدارى اللەرگياسى بارلار سانى الەم ەلدەرىندە كۇرت وسكەن. بۇل تۋرالى استانادا وتكەن «اللەرگولوگيا مەن يممۋنولوگياداعى سالا ارالىق ماسەلەلەر» III عىلىمي-پراكتيكالىق كونفەرەنسياسىندا ايتىلدى.
جيىن بارىسىندا اق حالاتتىلار اللەرگيالىق اۋرۋلاردىڭ الدىن الۋعا بولاتىن جاڭا تەتىكتەردى تالقىلادى. كونفەرەنسياعا قازاقستاننان بولەك يسپانيا، تۇركيا، ۋكراينا، گەرمانيا، ءۇندىستان مەن رەسەي فەدەراتسياسىنان اللەرگولوگ-يممۋنولوگ ماماندار جينالدى.
- ەڭ وزەكتى ماسەلە - وسى اللەرگيالىق جانە يممۋندىق سيستەماعا بايلانىستى اۋرۋلاردىڭ جىلدان جىلعا كوبەيىپ كەلە جاتقانى. 2000-جىلداردىڭ باسىندا 5 پايىز بولاتىن بولسا، ءقازىر اللەرگياعا شالدىققاندار سانى 40 پايىزعا دەيىن ءوستى. ءبىراق تا تىركەلمەگەندەرى دە بار. كوپ ناۋقاس ماماندارعا، اللەرگولوگ-يممۋنولوگتەرگە كەلە الماي، باسقا مامانداردا جۇرەدى، - دەيدى ق ر پرەزيدەنتى ءىس باسقارماسى اۋرۋحاناسىنىڭ باس اللەرگولوگ-يممۋنولوگى عاليا تۇسىپبەكوۆا.
قازاقستاندا اللەرگولوگ مامان تاپشى. سالادا ەل بويىنشا نەبارى 200 گە جۋىق مامان قىزمەت ەتىپ ءجۇر. ونىڭ 60 قا جۋىعى مەملەكەتتىك ەمحانالاردا جۇمىس ىستەيدى. ال، باس قالادا دارىگەر سانى 25 كە دە جەتپەيدى. ايتا كەتەيىك، شەتەلدىك ماماندار قازاقستاندىق اللەرگولوگتەردىڭ الەۋەتىن جوعارى باعالايدى.
- قازاقستاندا بىلىكتى دارىگەرلەر سانى از بولعانىمەن، ەمدەۋ ساپسى جوعارى. مەنىڭ ويىمشا، الەمنىڭ بارلىق ەلدەرى اللەرگيامەن بىركەلكى كۇرەسەدى. ەمدەۋ تاسىلدەرى دە بىردەي. ءيا، اراسىندا دارىگەرلەردىڭ جەكەمەنشىك جوسپارلارى جاعىنان ايىرماشىلىق بولۋى مۇمكىن. ءبىراق، وسىنداي كونفەرەنسيالار ارقىلى ءبىز پىكىر الماسىپ، وي ءبولىسىپ تۇرامىز. ءتۇرلى شەبەرلىك ساباقتارىن وتكىزۋ وسى سالادا ەڭبەك ەتىپ جۇرگەندەردىڭ بىلىكتىلىگىن ارتتىرۋعا ىقپال ەتەدى، - دەيدى اللەرگولوگ- يممۋنولوگ داريا فومينا (رەسەي).
ايتا كەتەيىك، «اللەرگولوگيا مەن يممۋنولوگياداعى سالا ارالىق ماسەلەلەر» III عىلىمي-پراكتيكالىق كونفەرەنتسياسى ءداستۇرلى تۇردە جىل سايىن ۇيىمداستىرىلىپ تۇرادى. بۇل جولعى كەلەسى كەزدەسۋ ەكى كۇنگە جالعاسادى.
كونفەرەنسيادا سيمپوزيۋمدار ۇيىمداستىرىلىپ، شەتەلدىك جانە قازاقستاندىق ماماندار اللەرگولوگيا مەن يممۋنولوگياداعى ەڭ وزەكتى ماسەلەلەر بويىنشا پىكىرتالاس وتكىزدى.
دارىلىك اللەرگيانى دياگنوستيكالاۋ مەن ەمدەۋدەگى جەتىستىكتەر، يممۋندىق جۇيەنىڭ تۋا بىتكەن اقاۋلارى تاقىرىبىندا شەبەرلىك ساباقتار ۇيىمداستىرىلدى.
