قازاقستاندا الداعى ءۇش جىلدا 1,3 مىڭ شاقىرىمنان استام تەمىرجول سالىنادى - پرەزيدەنت
قازاقستاندا الداعى ءۇش جىلدا 1,3 مىڭ شاقىرىمنان استام تەمىرجول سالىنادى. بۇل تۋرالى قازاقستان مەن رەسەيدىڭ XIX ءوڭىرارالىق ىنتىماقتاستىق فورۋمىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى Kazinform.
«اگروونەركاسىپ جانە ەكسپورت الەۋەتىنىڭ تولىققاندى پايدالانىلماۋىنا كوپ جاعدايدا كولىك- لوگيستيكا سالاسىنداعى شەكتەۋلەر اسەر ەتەدى. لوگيستيكا جانە قويما جۇيەسىنىڭ تاپشىلىعىنا بايلانىستى قازاقستان مەن رەسەيدە وندىرىلگەن اۋىل شارۋاشىلىعى ونىمدەرىنىڭ شىعىنى 40 پايىزعا جۋىقتايدى. سوندىقتان ءونىم ساقتاۋ ينفراقۇرىلىمىن دامىتۋ، سونىڭ ىشىندە ەليەۆاتورلاردى، كوكونىس، جەمىس- جيدەك قويمالارىن كوبەيتۋ ەكىجاقتى ىنتىماقتاستىقتىڭ ماڭىزدى باعىتىنا اينالۋعا ءتيىس»، - دەدى قاسىم- جومارت توقايەۆ.
مەملەكەت باسشىسى قازاقستان جۋىق ارادا كليماتتىق باقىلاۋ جۇيەسى بار ءونىم ساقتاۋ قويمالارىنىڭ سىيىمدىلىعىن 1 ميلليون تونناعا ۇلعايتۋدى جوسپارلاپ وتىرعانىن ايتتى.
«بىزدە قىتاي، ءۇندىستان، تاياۋ شىعىس ەلدەرى سياقتى كەلەشەگى زور ءونىم وتكىزۋ نارىقتارى بار. ولاردىڭ ازىق- تۇلىككە سۇرانىسى ۇلعايا تۇسكەنىن ەسكەرسەك، «سولتۇستىك - وڭۇستىك» كولىك ءدالىزىنىڭ دە ءرولى كۇشەيەدى. ورتالىق ازيا ارقىلى لوگيستيكانىڭ جاڭا باعىتتارىن دامىتۋ جانە قىتايمەن اراداعى قازىرگى كولىك باعدارلارىنىڭ جۇك وتكىزۋ مۇمكىندىگىن ارتتىرۋ ىقپالداستىقتىڭ باسىم باعىتتارىنىڭ ءبىرى بولا الادى. وسىعان بايلانىستى كاسپي تەڭىزىندەگى قۇرىق جانە اقتاۋ پورتتارىنا اۋقىمدى جاڭعىرتۋ جۇمىستارىن جۇرگىزۋدى جوسپارلاپ وتىرمىز. قىتاي باعىتىندا «دوستىق - مويىنتى» تەمىرجول ۋچاسكەسىنىڭ ەكىنشى جولىن سالۋ جوباسىن جۇزەگە اسىرۋعا كىرىستىك. جالپى، قازاقستاندا الداعى ءۇش جىلدا 1,3 مىڭ شاقىرىمنان استام تەمىرجول سالىنادى»، - دەدى مەملەكەت باسشىسى.
