قازاقستاندا 30 ميلليون گەكتارعا جۋىق جەر توزعان - توپىراقتى قورعاۋ تۋرالى زاڭ ازىرلەندى

ق ر ا ش م جەرگە ورنالاستىرۋ جۇمىستارى جونىندەگى مەملەكەتتىك ينستيتۋتىنىڭ مالىمەتىنشە، بۇگىندە ەلىمىزدە 29,9 ميلليون گەكتار جەر توزعان. ىقتيمال توپىراق قۇنارلىلىعى %17- عا تومەندەگەن، ال سۋارمالى جەرلەردەگى سورتاڭدى جەرلەر %35-37- عا ارتقان. سونىڭ سالدارىنان اۋىل شارۋاشىلىعى ءونىمىن ءوندىرۋ ازايعان.

− وتكەن جىلى «جايىلىمدار تۋرالى» زاڭعا جايىلىمداردىڭ توزۋ پروتسەستەرىنىڭ الدىن الۋعا، ولاردىڭ جاعدايىن تۇبەگەيلى جاقسارتۋعا باعىتتالعان، توپىراقتى قورعاۋ ماسەلەلەرىنە جانە جاسىل ەكونوميكا نەگىزدەرىنە تىكەلەي قاتىستى نورمالار ەنگىزىلدى. دەگەنمەن، ءقازىر ەگىستىك القاپتارىنىڭ توزۋى، ولاردىڭ قاراشىرىگىنىڭ ازايۋى قايتىمسىز قارقىن الۋدا، − دەدى ءماجىلىس دەپۋتاتى، جۇمىس توبىنىڭ جەتەكشىسى نۇرجان اشىمبەتوۆ.

ايتا كەتەرلىگى، جەر جانە ەكولوگيالىق كودەكستەردە توپىراقتى قورعاۋ سالاسىنداعى قاتىناستاردى رەتتەيتىن نورمالار جالپى سيپاتتا بولادى، وندا توپىراقتى قورعاۋدىڭ قۇقىقتىق تەتىكتەرى مەن شارالارى جوق.

− قولدانىستاعى جەر كودەكسىندە توپىراق بولىپ سانالاتىن قورشاعان ورتا وبەكتىلەرىنە (6-باپتىڭ 2-تارماعى) قاتىستى ارنايى زاڭنامالار قابىلداۋ كوزدەلگەن. توپىراقتى قورعاۋدى قۇقىقتىق رەتتەۋ مەن باسقارۋعا كەشەندى كوزقاراستىڭ بولماۋى توپىراقتىڭ ودان ءارى دەگراداتسيالانۋ، بيولوگيالىق ونىمدىلىكتىڭ تومەندەۋى جانە ولاردىڭ ەكونوميكالىق جانە ەكولوگيالىق مىندەتتەرىن ورىنداماۋ قاۋپىن تۋدىرادى. وسىعان بايلانىستى جوعارىدا اتالعان زاڭ جوبالارى ازىرلەندى، − دەپ ءتۇسىندىردى ن. اشىمبەتوۆ.

نەگىزگى زاڭ جوباسىنىڭ ەرەجەلەرى توپىراق رەسۋرستارىن ۇتىمدى پايدالانۋ، ولاردى جاسىلداندىرۋ، جەردىڭ نىسانالى ماقساتى مەن توپىراق قاسيەتتەرىنە بايلانىستى قۇقىقتىق رەجيمگە سارالانعان كوزقاراس، مينەرالدى تىڭايتقىشتار مەن پەستيتسيدتەردى پايدالانۋدى بارىنشا ازايتۋ، سونداي- اق توپىراقتى ەكوجۇيەنىڭ بولىگى رەتىندە تانۋ قاعيداتتارىنا نەگىزدەلگەن.

بۇعان دەيىن اقتوبە ەكولوگتارى توپىراق پەن وزەن سۋىنىڭ سىنامالارىن الىپ، لاستاۋشى زاتتاردى انىقتاعان ەدى.

اۆتور

ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى