قازاقستاندا 2027 -جىلى بالالار سانى 8 ميلليونعا جەتەدى
استانا. KAZINFORM - قازىرگى ۋاقىتتا ەلىمىزدە 6,9 ميلليون بالا بار. 2027 -جىلعا قاراي بالالار سانى 8 ميلليونعا دەيىن ۇلعايادى.
بۇل تۋرالى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا ايتىپ بەردى. 2024 -جىلى ق ر بالا قۇقىقتارى تۋرالى كونۆەنتسيانىڭ قابىلدانعانىنا 30 جىل تولدى. بۇل ارالىقتا ەلىمىز بالالاردىڭ قاۋىپسىزدىگى مەن ءال-اۋقاتىن ارتتىرۋدا ۇلكەن جولدان ءوتتى.
«مەملەكەتتىك ساياساتتىڭ باستى باسىمدىقتارىنىڭ ءبىرى - بالالاردى قورعاۋ مەن قولداۋ جانە سولاي بولىپ قالا بەرمەك. قازاقستاننىڭ بالالار قۇقىقتارى سالاسىنداعى حالىقارالىق ستاندارتتاردى ۇستانۋىن قازاقستان راتيفيكاتسيالاعان بالاعا قاتىستى حالىقارالىق شارتتاردىڭ ىسكە اسىرىلۋى دالەلدەيدى. «بالا قۇقىقتارى تۋرالى» جانە «ءبىلىم تۋرالى» نەگىزدەردى قوسا العاندا، قازاقستاننىڭ ۇلتتىق زاڭنامالىق بازاسى - بالالارىمىزدىڭ گۇلدەنگەن جانە ءقاۋىپسىز بالالىق شاعى قۇرىلاتىن قۇقىق قورعاۋ سالاسى»، - دەدى ناسىمجان وسپانوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
بالالاردىڭ ءال-اۋقاتىن جانە ۇلتتىق ساياساتتىڭ تيىمدىلىك دارەجەسىن باعالاۋ ءۇشىن 2021 -جىلى بالالار ءال-اۋقاتىنىڭ يندەكسى ازىرلەنگەن. 2024 -جىلدان باستاپ «ۇلتتىق قور - بالالارعا» جوباسى ىسكە قوسىلدى، ونىڭ شەڭبەرىندە ۇلتتىق قوردىڭ ينۆەستيتسيالىق تابىسىنىڭ %50 بارلىق بالالار اراسىندا بولىنەدى.
«قازىرگى ۋاقىتتا رەسپۋبليكادا 6,9 ميلليون بالا بار. رەسمي بولجامعا سۇيەنە وتىرىپ، 2027 -جىلعا قاراي قازاقستاندىق بالالار سانىنىڭ 8 ميلليونعا دەيىن ۇلعايۋىن كۇتەمىز. ەلىمىزدە 7849 مەكتەپتە 3,8 ميلليون بالا ءبىلىم الادى. وسى سالاداعى نەگىزگى ماسەلە ورىن تاپشىلىعى، ءۇش اۋىسىمدىلىق جانە مەكتەپتەردىڭ اپاتتىلىعى بولىپ وتىر. ونى شەشۋ ءۇشىن «جايلى مەكتەپ» ۇلتتىق جوباسى ىسكە اسىرىلۋدا»، - دەدى كوميتەت ءتوراعاسى.
