قازاقستانعا ۇرلانعان كولىكتىڭ قانداي ماركالارى ءجيى اكەلىنەدى
قىلمىسكەرلەر ۇرلانعان كولىكتەردى كوبىنە رەسەيدەن قازاقستانعا كىرگىزۋگە تىرىسادى. بۇل تۋرالى ق ر ىشكى ىستەر مينيسترلىگىنەن ءمالىم ەتتى، دەپ حابارلايدى قازاقپارات ءتىلشىسى.
«ەلىمىزدىڭ اۋماعىنا زاڭسىز كىرگىزىلگەن كولىكتەردىڭ كوبىسى رەسەي فەدەراتسياسىنىڭ اۋماعىندا ۇرلانعانى انىقتالدى. ستاتيستيكالىق مالىمەتتەرگە سايكەس، ەڭ كوپ ۇرلاناتىن كولىك ماركالارى رەسەيدە وندىرىلگەن اۆتوموبيلدەرگە قاتىستى. سونىمەن قاتار، Toyota, Mazda, Hyundai, Audi ماركالارى دا ءجيى ۇرلانادى»، - دەلىنگەن ىشكى ىستەر مينيسترلىگىنىڭ قازاقپارات اگەنتتىگىنە بەرگەن جاۋابىندا.
وسى ورايدا ۆەدومستۆو ماماندارى ساتىپ الاتىن اۆتوكولىكتى ءتيىستى تەكسەرۋدەن وتكىزۋ كەرەك ەكەنىن ءتۇسىندىردى.
«ەسكى اۆتوكولىكتى (قازاقستان رەسپۋبليكاسىندا تىركەلگەن) ساتىپ الۋ كەزىندە نەگىزگى قۇجاتتاردىڭ بار ەكەنىنە جانە ولاردىڭ ءتۇپنۇسقا ەكەنىنە كوز جەتكىزۋ كەرەك. بۇدان كەيىن كولىكتى ەگجەي-تەگجەيلى تەكسەرۋ كەرەك. تەكسەرۋدى ارناۋلى تەحنيكالىق قىزمەت كورسەتۋ ستانسياسىندا جۇرگىزگەن ءجون. وندا ولار قۇجاتتا جانە اۆتوكولىكتىڭ وزىندە كورسەتىلگەن نومىرلەنگەن تەتىكتەردىڭ سايكەستىگىن تەكسەرە الادى. سونىمەن قاتار، مامانداندىرىلعان حالىققا قىزمەت كورسەتۋ ورتالىعىندا كولىكتى قايتا تىركەۋ كەزىندە سالىق پەن ايىپپۇل بويىنشا قارىزدىڭ بار-جوعىن، ىزدەۋدە تۇرۋى مۇمكىندىگىن تەكسەرۋگە بولادى»، - دەپ اتالىپ وتكەن ۆەدومستۆو اقپاراتىندا.
