قازاقستانعا كوشىپ كەلگەن جولتاي مەن يۆانبەك قازاق ءتىلىن قالاي تەز ۇيرەندى

- قازاقستانعا العاش رەت كەلگەنىمدە قازاقتارعا مەنىڭ اتىمدى ايتۋ قيىن بولدى. ءتىلى كەلمەگەن سوڭ قازاق دوسىم «سەنى جولتاي دەپ اتايمىن» دەدى. سودان بەرى مەن ءوزىمدى جولتاي دەپ تانىستىرامىن، - دەيدى جوەل ادومسون.

ول ەلىمىزگە 1990 -جىلى كوشىپ كەلگەن. سودان بەرى بىرنەشە قالادا جۇمىس ىستەپ ۇلگەرگەن.

- مەنىڭ ايەلىم - ەستون ۇلتىنان. ول ءوزىنىڭ شىققان تەگىن جەتىك بىلگىسى كەلدى. ءبىراق ول كەزدە امەريكالىقتارعا ك س ر و-عا كىرۋ وتە قيىن بولدى. ۆيزا بەرمەيتىن. سول جىلى قازاقستاندا 1 جىل قازاق ءتىلىن ۇيرەنۋ ءۇشىن دايارلىق كۋرسى اشىلدى. ءبىز سول مۇمكىندىكتى پايدالاندىق. العاشىندا 1 جىل وقىپ، ا ق ش-قا قايتامىز دەپ ويلاعانبىز. ءبىراق بىزگە وسىندا جۇمىس ىستەۋگە ۇسىنىس جاسادى. قازاقستاندا الماتى، اتىراۋ قالالارىندا جۇمىس ىستەدىم. كەيىن ءبىراز جىل رەسەيدە تۇردىم. وندا ءجۇرىپ اۋىرىپ قالعان سوڭ، ەم الۋ ءۇشىن امەريكاعا قايتۋىما تۋرا كەلدى. جازىلعان سوڭ قازاقستانعا قايتا كەلدىم، - دەيدى ول.

امەريكالىق جولتاي قازاق ءتىلىن قالاي ۇيرەنگەنىن ايتىپ بەردى.

- مەن مۇندا كەلگەندە قازاقشا مۇلدە بىلمەدىم. ءبارىن جاڭادان باستادىم. ءبىر جىلدا ءتىلدى تولىق مەڭگەرە الماعان سوڭ، ەكىنشى جىلى جۇبايىمىز ەكەۋمىز جەكە مۇعالىم جالداپ وقۋىمىزدى جالعاستىردىق. بىزگە ورىس تىلىنە قاراعاندا قازاق ءتىلىن ۇيرەنۋ وڭاي بولدى. قازىر ورىسشا جاقسى بىلمەيمىز. سەبەبى ءبىز ءۇشىن ورىس ءتىلىنىڭ گرامماتيكاسى وتە قيىن. جانە ەكى ءتىلدى بىردەن تەرەڭ ۇيرەنۋ بىزگە قيىن بولدى. سول ءۇشىن ءبىز قازاق ءتىلىن تاڭدادىق. اتىراۋدا تۇرعانىمىزدا بالالارىمىزدى قازاق مەكتەبىنە بەردىك. ولار قازاقشا قاراپايىم تۇرعىندار سەكىلدى سۋداي سويلەيتىن. ءبىراق كەيىن رەسەيگە، رەسەيدەن ا ق ش-قا كوشتىك. 20 جىلدا ولار ءتىلدى ۇمىتىپ قالدى، - دەيدى ا ق ش ازاماتى.

امەريكادا تۋىپ، قازاق مادەنيەتىمەن ەتەنە تانىسقان جوەل ادومسون ەكى ەلدىڭ ايىرماشىلىعىنا دا توقتالدى.

- قازاقتار «بەس ساۋساق بىردەي ەمەس» دەيدى عوي. سول سەكىلدى ەكى ەلدىڭ ايىرماشىلىقتارى كوپ. ماعان قازاق ەلىنىڭ وتباسىلىق قۇندىلىقتاردى ءبىرىنشى ورىنعا قوياتىنى ۇنايدى. وعان قوسا باۋىرمالدىعى مەن قوناقجايلىعى بار. امەريكاداعى ادامدار تەك ءوزىن عانا ويلايدى. سونداي-اق قازاقتاردىڭ ءوز تىلىندە باتا بەرەتىنى ماعان ەرەكشە اسەر ەتەدى. مەن وسىدان ءبىر اي بۇرىن مالديۆ ارالدارىنا باردىم. ولار دا مۇسىلمان مەملەكەتى عوي. ونداعى تۇرعىنداردان تاماقتانىپ بولعان سوڭ «باتا بەرەسىڭدەر مە» دەپ ادەيى سۇرادىم. ولار «جوق، ءبىز ولاي ىستەمەيمىز» دەدى. مەن تاڭعالدىم. مەن مۇسىلمانداردىڭ ءبارى وسىلاي ءوز تىلدەرىندە باتا بەرەدى دەپ ويلاعان ەدىم، - دەيدى جوەل.

ا ق ش ازاماتى سۇبەلى سۇحباتىن باتا بەرىپ تۇيىندەدى.

- اللا تاعالا، بىزگە دەگەن جاقسىلىعىڭ مەن مەيىرىمىڭ ءۇشىن العىس ايتامىز. ءبىزدىڭ جۇرگەن جولدارىمىز وزىڭە ۇنامدى بولسىن. سەنىمىمىزدى نىعايتىپ، ءبىزدى جەتەلەي كور. ءتاڭىر يەم، بارلىق ۋاقىتتا دانالىق پەن پاراساتتىلىق بەرە كور. وسى باعدارلاماعا جانە قازاق ەلىنە اماندىق بەرە گور، - دەدى ستۋديا قوناعى.

قازاقستانعا وزگە مەملەكەتتەن كوشىپ كەلگەندەردىڭ ءبىرى - يۆان چەرۆينسكي. ول - رەسەيلىك ازامات. بۇعان دەيىن تۇركياعا دا قونىستانىپ كورگەن. الايدا 2 جىلدان بەرى الماتىدا تۇرادى.

- مەنىڭ اتىم - يۆان. قازاقشا ەسىمىم - يۆانبەك. قازاقستانعا تۇپكىلىكتى قونىس اۋدارعانىما جۋىردا 2 جىل بولادى. ءبىراق 8 جىلدان بەرى الماتىعا كەلىپ-كەتىپ ءجۇرمىن. قازاقتار - وتە ادال. ال قازاقستان قوناقجايلىلىق جاعىنان الەمدە ءبىرىنشى ورىن الادى. ءوزىم تۋرالى ايتار بولسام، مەن - بلوگەرمىن. قازىرگى كەزدە قازاقستان تۋرالى تەك قانا جاعىمدى جاڭالىق ايتىپ، كوپشىلىكتەن ءسۇيىنشى سۇراپ ءجۇرمىن، - دەيدى يۆان.

«بۇگىن LIVE» باعدارلاماسىنا ونلاين سۇحبات بەرگەن كەيىپكەرىمىز بالالارىنا دا قازاق ءتىلىن ۇيرەتەتىنىن ايتتى.

- قازىر وتباسىم سانكت-پەتەربوردا. ايەلىم اللەرگياسىنا بايلانىستى سول جاققا قايتۋعا تۋرا كەلدى. ءبىراق وسىندا كەلگەندە قىزىمدى قازاق مەكتەبىنە، ۇلىمدى قازاق بالاباقشاسىنا بەردىم، - دەيدى ول.

بۇگىندە يۆان Jibek Joly ارناسىنداعى «ءدامدى دودا» جوباسىنىڭ قاتىسۋشىسى ەكەنىن ايتا كەتەيىك.

- جوباداعى ەڭ ءدامدى دايىنداعان اسىم - قازاقشا ەت. جالپى، قازاق اسحاناسىندا ءدامدى تاعامدار وتە كوپ. ماعان قاتتى ۇنايتىن تاماقتار - ەت، قۋىرداق، سىرنە، باۋىرساق، قىمىز. قازاق اسحاناسى باسقا ەلدەرگە قاراعاندا وتە ەرەكشە. سەبەبى بۇل اسحانادا ءبارى بار. قازاق اسحاناسى، قازاق اۋەندەرى جانە قازاق ءتىلى - قازاقستاننىڭ ەڭ باستى بايلىعى. شەتەل ازاماتتارىن تاڭعالدىرادى. ماسەلەن، باسقالار ءۇشىن جىلقى ەتىن جەۋ - تاڭعالارلىق جاعداي. شىنىندا جىلقى ەتى جاي عانا ءدامدى ەمەس، ول وتە پايدالى. سەبەبى وندا حولەستەرين از جانە ادامعا كۇش بەرەدى، - دەيدى كەيىپكەرىمىز.

اۆتور

ارۋجان ماحمۋت

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى