قازاقستانعا حالىق سانىنىڭ ءوسۋى نەسىمەن ماڭىزدى - دەموگراف پىكىرى

«ارينە، ەڭ نەگىزگىسى - ۇلتتىق قاۋىپسىزدىك. اسىرەسە شەكارا ماڭىنداعى اۋماقتاردا حالىقتىڭ ورنالاسۋى ءبىرىنشى كەزەكتە ماڭىزدى. حالىقتىڭ سانى وسپەيتىن بولسا، وندا ەكونوميكالىق- الەۋمەتتىك دامۋ بولمايدى. ويتكەنى بارلىعى ادام ءۇشىن جاسالادى جانە ونى ادامدار جاسايدى. حالىقتىڭ سانى جەتكىلىكسىز بولسا، ينۆەستيسيالار دا كوپ كەلمەيدى. قازىرگى تاڭدا نەگە ينۆەستورلار كوبىنە وزبەكستانعا كەتىپ جاتىر؟ ويتكەنى، وندا حالىق سانى كوپ جانە تۇتىنۋ نارىعى مەن ارزان ەڭبەك كۇشىن تابۋعا مۇمكىندىك بار. تاۋەلسىزدىك العان 1991 -جىلى قازاقستاندا حالىق سانى 16 ميلليون بولدى جانە 90 -جىلدارى جاپپاي ەميگراتسيا مەن تۋۋ كورسەتكىشىنىڭ تومەندەۋى حالىق سانىن ەداۋىر ازايتتى. بۇل 16 ميلليوندىق مەجەگە قازاقستان 2009 -جىلى عانا قايتا جەتتى»، - دەدى دەموگراف اگەنتتىك تىلشىسىنە بەرگەن سۇحباتىندا.

ساراپشى، پاندەمياعا قاراماستان، ەلىمىزدىڭ 20 ميلليوندىق مەجەگە جەتە العانىن، مۇنداي ءوسىم ەل تاريحىندا بولماعانىن اتاپ ءوتتى.

«وسى دەموگرافيالىق وزگەرىستەرگە قاراپ، تۇتاس الەۋمەتتىك جانە ەكونوميكالىق ساياساتتى جاڭارتۋ ءۇشىن جاڭا باستاما بەرىلگەنىن ءتۇسىنۋىمىز كەرەك. ەلىمىزدىڭ وتكەن عاسىردا قانداي زاۋالدى باستان كەشىرگەنىن ەسكەرسەك، دەموگرافيالىق، جاھاندىق سىن-قاتەرلەردى ەسكەرسەك، مۇنىڭ ماڭىزدى جەتىستىكتەردىڭ ءبىرى ەكەنىن ءتۇسىنۋىمىز كەرەك. پاندەميا كەزىندە بىزدە دەموگرافيالىق جاعدايدىڭ كۇرت ناشارلاۋى بولعان جوق. ءبىز 20 ميلليونىنشى تۇرعىننىڭ دۇنيەگە كەلگەنىن ايتىپ قانا قويماي، ودان ءارى ساياساتتى جۇرگىزۋىمىز كەرەك»، - دەيدى ا. ساعىنبايەۆا.

ماماننىڭ ايتۋىنشا، ەلىمىزدە تۋۋ كورسەتكىشى بويىنشا تۇركىستان، ماڭعىستاۋ جانە اتىراۋ وبلىستارى ءداستۇرلى تۇردە كوش باستاپ تۇر. مۇنداي ءۇردىستى جاس قۇرىلىمىمەن، ەتنيكالىق قۇراممەن بايلانىستىرۋعا بولادى، ياعني بۇل وڭىرلەردە قازاقتار مەن باسقا دا ازيالىق ەتنوستاردىڭ وكىلدەرى كوبىرەك تۇرادى.

«20 ميلليون ادام - جاي عانا سيفر ەمەس. ونىڭ جاعىمدى جاقتارىمەن قاتار، سالدارى تۋرالى دا ويلانۋ كەرەك. ءاربىر تۋعان بالا - ءبىزدىڭ ادامي كاپيتالىمىز. ونىڭ قاي جەردە وقيتىنىن، العان ءبىلىم ساپاسى قانداي بولاتىنىن، دەنساۋلىعىن، وعان قولجەتىمدى جاعدايلار مەن يگىلىكتەردى، ءار بالانىڭ الەۋەتىن قالاي جۇزەگە اسىرۋعا بولاتىنىن ويلاۋ قاجەت. ارينە، بۇل ءبىرىنشى كەزەكتە اتا-انالاردىڭ جاۋاپكەرشىلىگى. ەكىنشىدەن، زاڭنىڭ ساقتالۋى، ءتيىستى ساياساتتى قالىپتاستىرۋ - قوعام مەن مەملەكەتتىڭ جاۋاپكەرشىلىگى»، - دەپ تولىقتىردى دەموگراف اياۋلىم ساعىنبايەۆا.

بۇعان دەيىن مەملەكەت باسشىسى قاسىم-جومارت توقايەۆ قازاقستاندىقتاردى حالىق سانىنىڭ 20 ميلليونعا جەتۋىمەن قۇتتىقتاعان ەدى.

اۆتور

ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى