قازاقستانعا ارام پيعىلىن ىسكە اسىرماق بوپ كەلگەن شەتەلدىك ۇستالدى

قوستاناي وبلىسىندا پوليتسيا قىزمەتكەرلەرى ۇلتتىق قاۋىپسىزدىك كوميتەتى دەپارتامەنتىمەن جانە وبلىستىق پروكۋراتۋرامەن بىرلەسە وتىرىپ، سيم بوكستاردىڭ زاڭسىز قىزمەتىنىڭ جولىن كەسۋ بويىنشا ارنايى وپەراتسيا وتكىزدى. رۋدنىي قالاسىندا جۇرگىزىلگەن جەدەل ءىس-شارالار بارىسىندا كورشى مەملەكەتتىڭ ازاماتى ۇستالدى. تەكسەرىس ناتيجەسىندە ونىڭ قازاقستانعا الاياقتىق ارەكەتتەر جاساۋ ماقساتىندا ارنايى كەلگەنى انىقتالعان.

جەدەل ۋاكىلدەر كۇدىكتىنىڭ جالعا العان پاتەرىن ءتىنتۋ بارىسىندا قىلمىستىق ارەكەتتەردى جۇزەگە اسىرۋعا ارنالعان قۇرال-جابدىقتاردى تاپتى. ونىڭ ىشىندە ۆيرتۋالدى ابونەنتتىك نومىرلەردى تىركەۋگە پايدالانىلعان SIM بوكس قۇرىلعىسى، ينتەرنەت مارشرۋتيزاتور، ەكى IMEI كودى بار ۇيالى تەلەفون، قازاقستاندىق ۇيالى وپەراتورلاردىڭ 1200 دەن اسا SIM كارتاسى، سەگىز بانك كارتاسى جانە اۆيابيلەتتەر تاركىلەندى.

«كۇدىكتى SIM بوكستى باسقارۋ ءۇشىن Telegram مەسسەندجەرى ارقىلى بەلگىسىز «كۋراتورلاردان» نۇسقاۋلار الىپ وتىرعانى انىقتالدى. ول وسى ارەكەتتەرى ءۇشىن كۇن سايىن 200 ا ق ش دوللارى كولەمىندە سىياقى العان»، - دەپ جازىلعان حابارلامادا.

قازىر بۇل دەرەك بويىنشا سوتالدى تەرگەۋ جۇرگىزىلىپ جاتىر. ۇستالعان ازامات رۋدنىي قالاسى پوليتسيا باسقارماسىنىڭ ۋاقىتشا ۇستاۋ يزولياتورىنا قامالدى.

ايتا كەتەيىك، ونىڭ كىناسى دالەلدەنسە، قازاقستان رەسپۋبليكاسىنىڭ زاڭناماسىنا سايكەس ەكى جىلعا دەيىن باس بوستاندىعىنان ايىرىلۋى مۇمكىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى