قازاقستان تۇركياعا ەت جەتكىزۋدى جوسپارلاپ وتىر
استانا. KAZINFORM - قازاقستان تۇركياعا ەت جەتكىزۋدى جوسپارلاپ وتىر. بۇل تۋرالى اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى مالىمدەدى.
شەنەۋنىكتىڭ ايتۋىنشا، بىلتىر قازاقستان مەن تۇركيا اراسىنداعى تاۋار اينالىمىنىڭ كولەمى شامامەن 285 ميلليون دوللار بولعان.
«ەكسپورتتىڭ نەگىزگى تاۋارلارى - ءداندى جانە بۇرشاقتى داقىلدار. ال تۇركيادان اكەلىنەتىن نەگىزگى يمپورت - كوكونىستەر، جەمىستەر، جاڭعاقتار جانە باسقا دا داقىلدار»، - دەدى كەنجەحان ۇلى سەنات دالىزىندە.
ونىڭ ايتۋىنشا، قازاقستان تۇركياعا ەت ەكسپورتتاۋدى جوسپارلاپ وتىر.
«قازىر ەت پەن ەت ونىمدەرىن ەكسپورتتاۋ بويىنشا جۇمىس ىستەپ جاتىرمىز. تۇركيانىڭ ۆەتەرينارلىق قىزمەتىمەن ءتيىستى جۇمىستار اتقارىپ جاتىرمىز. سونداي-اق، تۇركياعا ەت جانە ەت ونىمدەرىن ەكسپورتتاۋعا نيەتتى كاسىپورىنداردى كەلىسۋ پروتسەسى جۇرگىزىلىپ جاتىر»، - دەپ ءتۇسىندىردى ۆيتسە-مينيستر.
ەسكە سالايىق، بۇعان دەيىن ەت باعاسى تۋرالى حابارلاندى.
