قازاقستان پرەزيدەنتى: تۇركى مەملەكەتتەرى تاريحىندا ءالى زەرتتەلمەگەن اقتاڭداقتار بار
اقوردادا ءوتىپ جاتقان تۇركى مەملەكەتتەرى ۇيىمىنىڭ 10- سامميتىندە مەملەكەت باسشىسى قاسىم-جومارت توقايەۆ تۇركى مەملەكەتتەرىنىڭ ورتاق مۇراعاتىن زەرتتەۋدى ۇسىندى، دەپ حابارلايدى Kazinform.
«ءبىرىنشى باسىمدىق - سالت-ءداستۇر (Traditions). شىن مانىندە، تۇركى بىرلىگىن دارىپتەۋدىڭ ماڭىزى وتە زور. ءبىزدىڭ تاريحىمىز، مادەنيەتىمىز، ءتىلىمىز جانە ءدىلىمىز - ورتاق. وسىعان بايلانىستى تۇركى مەملەكەتتەرى ۇيىمىنىڭ، ونىڭ قۇرىلىمدارىنىڭ تۋلارىن جانە ەمبلەمالارىن ءبىر ۇلگىگە كەلتىرگەن ءجون. بۇگىن وزدەرىڭىزگە ۇسىنىلعان ەسكيزدەردى بىرگە قاراپ، ورتاق شەشىم قابىلدايمىز. بۇل تاريحي ءسات بولماق. تاريحتان سىر شەرتەتىن ورتاق مۇراعاتتى زەرتتەپ، ۇرپاققا اقيقاتتى جەتكىزۋ - ءبىزدىڭ پارىزىمىز. قۇزىرلى ورگاندارىمىزعا بەيمالىم دەرەكتەردى بىرلەسىپ زەردەلەۋدى تاپسىرۋدى ۇسىنامىز. بۇل، شىن مانىندە، ماڭىزدى جۇمىس بولماق، سەبەبى ورتاق تاريحىمىزدا ءالى دە تولىق زەرتتەلمەگەن اقتاڭداقتار بار»، - دەدى پرەزيدەنت.
سونداي-اق مەملەكەت باسشىسى ەلدەرىمىزدىڭ تەلەحيكايالارىن ءوزارا ناسيحاتتاۋ ماڭىزدى ەكەندىگىن باسا ايتتى.
«اسىرەسە، بالالارعا ارنالعان انيماتسيالىق فيلمدەردى كوبىرەك تاراتقان ءجون. بۇعان الەۋمەتتىك جەلىنى پايدالانۋ، تانىمال مەديا تۇلعالاردى جۇمىلدىرۋ كەرەك دەپ ەسەپتەيمىز. سول ارقىلى جاستارىمىزدى رۋحاني تۇرعىدان جاقىنداستىرۋعا مۇمكىندىك تۋارى ءسوزسىز»، - دەدى قاسىم-جومارت توقايەۆ.
