قازاقستان پرەزيدەنتى قىتاي ءتىلىن قالاي جەتىك مەڭگەرگەن – قىتاي سايتى ماقالا جاريالادى
مەملەكەت باسشىسى قاسىم-جومارت توقايەۆتىڭ قىتايعا كەزەكتى رەسمي ساپارىنا بايلانىستى قىتايلىق Shanghai Observer سايتى ماقالا جاريالادى. وندا قازاقستان پرەزيدەنتىنىڭ قىتاي ءتىلىن جەتىك مەڭگەرگەنى باياندالعان، دەپ حابارلايدى Kazinform.
ءتىلشى بەيجىڭ لينگۆيستيكالىق ينستيتۋتىندا تاعىلىمدامادان وتكەن قاسىم-جومارت كەمەل ۇلىنا ءدارىس وقىعان پروفەسسور ليۋ شيچينمەن كەزدەسىپ، ونى سوزگە تارتقان. ونىڭ «بولاشاق پرەزيدەنتكە ساباق بەرگەن كەزىڭىزدە ەرەكشە ەسىڭىزدە قالعان وقيعالار بولدى ما؟» دەگەن ساۋالىنا ليۋ شيچين:
- ول كەزدە قاسىم-جومارت توقايەۆ 31 جاستا، مەن 44 جاستا ەدىم. جايشىلىقتا ارامىز وتە جاقىن بولدى دەپ ايتا المايمىن. ماعان ەرەكشە اسەر ەتكەن ءبىر وقيعا بولدى. وقۋدى اياقتاۋعا 5 اپتا قالعان ءسات، بىردە ۆيدەو-پراكتيكالىق ءدارىس ءوتىپ، بارلىعىمىز بىرگە يانتسزى(چاڭجياڭ – رەد.) تۋرالى ۆيدەونى قارادىق. سوڭىنان ديكتورلىق ستيلدە ۆيدەوعا قايتا دىبىس جازدىردىم. سوندا ونىڭ «ەلگە قايتىپ بارعاندا بۇل ءادىستى ونداعى ۇستازدارىممەن بولىسەمىن» دەپ ءماز بولعانى ەسىمدە. ول ۇزدىك وقىدى، ساباق ۇلگەرىمى تۋرالى قۇجاتتار ءالى ساقتاۋلى، كوزبەن كورىپ، اقيقاتىنا جەتۋلەرىڭىزگە بولادى، - دەپ جاۋاپ بەردى.
قىتايلىق ب ا ق دايىنداعان ۆيدەودا پرەزيدەنت قاسىم-جومارت توقايەۆتىڭ بەيجىڭ لينگۆيستيكالىق ينستيتۋتىندا تاعىلىمدامادان وتكەن كەزىندەگى مۇراعاتتىق قۇجاتتارى مەن ەسكى سۋرەتتەرى دا كورسەتىلگەن.
ەسكە سالايىق، مەملەكەت باسشىسى قىتاي حالىق رەسپۋبليكاسىنا 16-قازاندا رەسمي ساپارمەن باردى. ق. توقايەۆ كەلەسى كۇنى ءبىرقاتار كەزدەسۋ وتكىزدى، سونىڭ ىشىندە ق ح ر ءتوراعاسى شي جينپيڭمەن كەلىسسوز جۇرگىزدى.
پرەزيدەنت بەيجىڭ لينگۆيستيكالىق ينستيتۋتىندا تاعىلىمدامادان وتكەن كەزىندە وزىنە ءدارىس بەرگەن پروفەسسور ليۋ شيچينمەن اڭگىمەلەستى.
اۆتور
مۇحتار مۇرات
