قازاقستان قىتاي كومپانيالارىن سيرەك كەزدەسەتىن مينەرالداردى بىرلەسىپ يگەرۋگە شاقىردى
استانا. KAZINFORM - قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ ەكى ەل اراسىنداعى ەكونوميكالىق قارىم-قاتىناستىڭ ماڭىزدى تۇستارىنا توقتالىپ ءوتتى.
«قازاقستان ۇكىمەتى قىتاي تاراپىنىڭ ينۆەستيتسيالار كولەمىن ارتتىرا تۇسۋگە دەگەن نيەتىن تولىق قۇپتايدى. قازىر مۇناي-گاز، حيميا، مەتاللۋرگيا، اگروونەركاسىپ، تاۋ-كەن ونەركاسىبى جانە باسقا دا سالالاردا ونداعان ءىرى بىرلەسكەن جوبالار جۇزەگە اسىرىلدى. سونىمەن قاتار، وزىق تەحنولوگيالار، يننوۆاتسيا جانە عىلىمي-زەرتتەۋدەگى الەۋەتىمىزدى ءارى قاراي جەتىلدىرۋ ءبىز ءۇشىن اسا ماڭىزدى»، - دەدى مۇرات نۇرتىلەۋ قىتايدىڭ سىرتقى ىستەر مينيسترىمەن كەزدەسۋدەن كەيىن ب ا ق- قا مالىمدەمە جاساپ.
ءمينيستردىڭ ايتۋىنشا، ەكى ەل جوعارى ساپالى تەحنولوگيالىق ىنتىماقتاستىققا ەرەكشە نازار اۋدارىپ وتىر.
«اتاپ ايتقاندا، ەلىمىزدە ەلەكتروموبيلدەر ءوندىرىسىن قۇرۋ تۋرالى قىتاي تاراپىنىڭ ۇسىنىسىنا قازاق تاراپى تولىقتاي قولداۋ كورسەتپەك. ءوز كەزەگىمىزدە، سيرەك كەزدەسەتىن مينەرالدار قورىن بىرلەسىپ يگەرۋگە قىتاي كومپانيالارىن شاقىرامىز»، - دەدى م. نۇرتىلەۋ.
بۇعان دەيىن ەلىمىزدىڭ سىرتقى ىستەر ءمينيسترى مۇرات نۇرتىلەۋ «قازاق-قىتاي» ىقپالداستىعى بۇرىن-سوڭدى بولماعان بەلەستەرگە شىققانىن ايتقان ەدى.
بىلتىر قازاقستان مەن قىتاي اراسىنداعى تاۋار اينالىمى 41 ميلليارد دوللارعا جەتكەن.
