قازاقستان قورعانىس ءمينيسترى بەلارۋستە رەسمي ساپارمەن ءجۇر
قورعانىس ۆەدومستۆوسىنىڭ باسشىسى گەنەرال- پولكوۆنيك رۋسلان جاقسىلىقوۆ مينسكىگە ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەر سىرتقى ىستەر مينيسترلەرى كەڭەسى، قورعانىس مينيسترلەرى كەڭەسى، ۇجىمدىق قاۋىپسىزدىك تۋرالى شارت ۇيىمى مۇشەلەرى - مەملەكەتتەر قاۋىپسىزدىك كەڭەستەرى حاتشىلارى كوميتەتىنىڭ بىرلەسكەن وتىرىسىنا قاتىسۋ ءۇشىن باردى.
بۇل تۋرالى Kazinform ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
ورتالىق وفيتسەرلەر ۇيىندە ەكى ەلدىڭ قورعانىس مينيسترلەرى گەنەرال- پولكوۆنيك رۋسلان جاقسىلىقوۆ پەن گەنەرال- لەيتەنانت ۆيكتور حرەنيننىڭ كەزدەسۋى ءوتتى.
ونىڭ قورىتىندىسى بويىنشا قازاقستان مەن بەلارۋس قورعانىس ۆەدومستۆولارىنىڭ باسشىلارى قورعانىس مينيسترلىكتەرى اراسىنداعى 2024 -جىلعا ارنالعان ىنتىماقتاستىق جوسپارىنا قول قويدى.
گەنەرال- پولكوۆنيك رۋسلان جاقسىلىقوۆ اسكەري ىنتىماقتاستىق سالاسىنداعى قازاقستان- بەلارۋس قاتىناستارىنىڭ دەڭگەيى ارتىپ كەلە جاتقانىن العا تارتتى.
- قازاقستان تىنىشتىقتى جاقتايتىن مەملەكەت رەتىندە بەيبىتشىلىكتى ساقتاۋعا، ءارى ۇ ق ش ۇ- نىڭ جاۋاپكەرشىلىك ايماعىنداعى قاۋىپسىزدىكتى قامتاماسىز ەتۋدە بىرلەسكەن جۇمىستارعا مۇددەلى، - دەپ اتاپ ءوتتى ول.
قازاقستان قورعانىس ءمينيسترى «جەڭىس» مونۋمەنتىنە گۇل شوقتارىن قويۋ راسىمىنە قاتىستى.
وسى كۇنى بەلارۋس رەسپۋبليكاسى اسكەري اكادەمياسىنىڭ قارۋلى كۇشتەرى باس شتابىنىڭ فاكۋلتەتىندە بريفينگ ءوتتى. وندا قازاقستاندىق دەلەگاتسيا وقۋ ورنىنىڭ اسكەري كادرلارىن دايارلاۋ قۇرىلىمىمەن، مىندەتتەرىمەن جانە جۇيەسىمەن تانىستى.
قورعانىس ۆەدومستۆوسىنىڭ باسشىسى گەنەرال- پولكوۆنيك رۋسلان جاقسىلىقوۆ بەلارۋس اسكەري اكادەمياسىندا وقيتىن قازاقستاندىق اسكەري قىزمەتشىلەرمەن دە كەزدەستى. ول ءبىلىم بەرۋ باعدارلامالارىنىڭ مازمۇنىنا، وقۋ پروتسەسىنە جانە اسكەري قىزمەتشىلەر مەن ولاردىڭ وتباسى مۇشەلەرىنە ارنالعان تۇرمىستىق جاعدايلارعا دا نازار اۋداردى.
اۆتور
ايدار وسپاناليەۆ
