قازاقستان مۇنايىن رەسەي ارقىلى ترانزيتتەۋ رەسەيدىكىن قازاقستان ارقىلى ترانزيتتەۋدەن نەگە قىمبات

ەنەرگەتيكا مينيسترلىگىنىڭ مالىمەتىنشە، قازاقستان مۇنايى رەسەي اۋماعى ارقىلى 4 باعىتپەن ترانزيتەلەدى:

«اتىراۋ- سامارا - اداموۆا زاستاۆا باعىتىندا مۇناي تاسىمالداۋ تاريفى تونناسسىنا - 8557,7 تەڭگە (29.03.2024 ج باعام بويىنشا 19 دوللار)؛

اتىراۋ- سامارا - ۋست- لۋگا باعىتىندا تونناسىنا - 7272,9 تەڭگە (29.03.2024 ج باعام بويىنشا 16,2 دوللار)؛

اتىراۋ- سامارا - شەسحاريس باعىتىندا تونناسىنا - 6972,9 تەڭگە (29.03.2024 ج. باعام بويىنشا 15,5 دوللار)؛ك ت ك قۇبىرى ارقىلى تاسىمالداۋ تونناسىنا - 38 دوللار»، - دەلىنگەن جاۋاپتا.

ەسكە سالساق، 27-ناۋرىزدا ءماجىلىس رەسەي مۇنايىن قازاقستان ارقىلى قىتايعا تاسىمالداۋ كەلىسىمىنە ەنەتىن وزگەرىستەردى ماقۇلداعان بولاتىن. بۇل كەلىسىم بويىنشا رەسەي مۇنايىن قازاقستان ارقىلى ترانزيتتەۋ ءتاريفى تونناسىنا 2,1 دوللار بولماق.

«تون-2 مۇناي قۇبىرى (رەسەيدىڭ تۋيمازى قالاسىنان قازاقستاننىڭ پاۆلودار قالاسىنا دەيىن) بويىنشا ايتساق، بۇعان دەيىن 1 توننا مۇنايدىڭ ترانزيتىنە 799,45 تەڭگە الىنىپ كەلگەن. ياعني، مارشرۋتتىڭ ءتاريفى دوللار باعامىن 440 تەڭگە دەپ ەسەپتەگەندە، تونناسىنا 1,82 دوللار بولاتىن. تاراپتار كەلىسسوزدەر كەزىندە اتالعان ۋچاسكەدەگى تاريفتى تونناسىنا 2,1 دوللار ەتىپ بەلگىلەۋ تۋرالى كەلىسىمگە قول جەتكىزدى. بۇل قازىر قولدانىلىپ جۇرگەن تاريفتەن جوعارى»،-دەلىنگەن مينيسترلىكتىڭ مالىمەتىندە.

دەمەك، قازاقستان مۇنايىن رەسەي ارقىلى ەكسپورتقا شىعارۋ تاريفى رەسەي مۇنايىن قازاقستان ارقىلى ەكسپورتقا شىعارۋ تاريفىنەن 7-9 ەسە، ال كاسپي قۇبىر كونسورتسيۋمى ارقىلى 19 ەسە قىمبات. مۇنىڭ سەبەبىن مينيسترلىك ەكى ەلدىڭ زاڭناماسىنداعى ايىرماشىلىقتارمەن بايلانىستىرىپ وتىر.

«قازاقستان رەسپۋبليكاسى مەن رەسەي فەدەراتسياسى زاڭنامالارىنىڭ ايىرماشىلىقتارىنا بايلانىستى ءار ەلدە ءترانزيتتىڭ باعاسى ءارتۇرلى»، - دەلىنگەن جاۋاپتا.

ۆەدومستۆو دەرەگىنە قاراعاندا، 2023 -جىلدىڭ قورىتىندىسى بويىنشا قازاقستان رەسەي فەدەراتسياسى ارقىلى 65,8 ميلليون توننا مۇناي تاسىمالداعان. سونىڭ ىشىندە كاسپي قۇبىر كونسورتسيۋمى ارقىلى 56,6 ميلليون توننا، اتىراۋ-سامارا قۇبىرىنىڭ ءۇش باعىتى ارقىلى 9,2 ميلليون توننا مۇناي جونەلتكەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى