قازاقستان مەن گۆينەيا-بيساۋ پرەزيدەنتتەرى «استانا» حالىقارالىق قارجى ورتالىعىنا باردى

ا ح ق و باسقارۋشىسى رەنات بەكتۇروۆ قارجى ورتالىعىنىڭ قۇرىلىمى جانە قىزمەتىنىڭ نەگىزگى باعىتتارى تۋرالى مالىمەت بەردى. ونىڭ ايتۋىنشا، ەكى ەل ورتالىق الاڭىندا ينۆەستيتسيا، جاسىل جانە يسلامدىق قارجىلاندىرۋ، سونداي-اق قارجى سالاسىنىڭ ماماندارىن وقىتۋ سەكىلدى باسىم باعىتتار بويىنشا ىنتىماقتاستىق ورناتا الادى.

بۇگىندە ا ح ق و ارقىلى تارتىلعان ينۆەستيتسيا كولەمى 14 ميلليارد دوللاردى قۇراعان. ونىڭ 6,7 ميلليارد دوللارى — Astana International Exchange بيرجاسىنداعى پورتفەلدىك ينۆەستيتسيالار. ورتالىقتا الەمدەگى 85 ەلدىڭ 3400 دەن استام كومپانياسى تىركەلگەن. ولاردىڭ قاتارىندا افريكا قۇرلىعىنان 6 كومپانيا بار.

قازاقستان مەن گۆينەيا-بيساۋ پرەزيدەنتتەرىنە پرەتسەدەنتتىك قۇقىق نورمالارى مەن قاعيداتتارىنا نەگىزدەلگەن ورتالىق ازياداعى العاشقى سوت جۇيەسى – ا ح ق و سوتىنىڭ، سونداي-اق حالىقارالىق تورەلىك ورتالىعى مەن جاسىل قارجى ورتالىعىنىڭ قىزمەتى تۋرالى باياندالدى.

مەملەكەتتەر باسشىلارى ا ح ق و قارجىلىق قىزمەتتەر كورسەتۋدى رەتتەۋ جونىندەگى كوميتەتىنىڭ (AFSA) جۇمىسىمەن جانە قارجى ورتالىعىنىڭ رەتتەۋ رەجيمىنىڭ ەرەكشەلىكتەرىمەن تانىستى.

ايتا كەتەيىك، كەشە مەملەكەت باسشىسى قاسىم-جومارت توقايەۆ اقوردادا ەلىمىزگە رەسمي ساپارمەن كەلگەن گۆينەيا-بيساۋ پرەزيدەنتى ۋمارۋ سيسوكۋ ەمبالونى سالتاناتپەن قارسى العانىن جازدىق.

كەيىننەن قازاقستان مەن گۆينەيا-بيساۋ پرەزيدەنتتەرى بىرلەسكەن مالىمدەمە قابىلداعانى بەلگىلى بولدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى