قازاقستان مەن سان- مارينو رەسپۋبليكاسى اراسىندا ۆيزاسىز رەجيم ورناتىلادى
9-قاراشادا سان- مارينو قالاسىندا قازاقستان مەن سان- مارينو رەسپۋبليكاسىنىڭ ۇكىمەتى اراسىنداعى ۆيزالىق تالاپتاردان بوساتۋ تۋرالى كەلىسىمگە قول قويۋ ءراسىمى ءوتتى، دەپ حابارلايدى Kazinform اگەنتتىگى ق ر يتاليا رەسپۋبليكاسىنداعى ەلشىلىگىنە سىلتەمە جاساپ.
قۇجاتقا ق ر مالتا جانە سان- مارينو رەسپۋبليكاسىنداعى توتەنشە جانە وكىلەتتى ەلشىسى ەربولات سەمبايەۆ جانە سان- مارينو رەسپۋبليكاسىنىڭ سىرتقى ىستەر، حالىقارالىق ەكونوميكالىق ىنتىماقتاستىق جانە تەلەكوممۋنيكاتسيالار جونىندەگى مەملەكەتتىك حاتشىسى لۋكا بەككاري قول قويدى.
كەلىسىم ەكى مەملەكەتتىڭ ازاماتتارىن العاشقى كىرۋ ساتىنەن باستاپ ۆيزالىق تالاپتاردان 90 كۇنگە بوساتادى. ەكى ەل ازاماتتارىنىڭ جول ءجۇرۋ قۇجاتتارى: ازاماتتىڭ ءتولقۇجاتى، ديپلوماتيالىق جانە قىزمەتتىك ءتولقۇجاتى.
ق ر ۇكىمەتى مەن سان- مارينو ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم تاراپتاردىڭ ءوزارا كەلىسۋى ءۇشىن قاجەتتى مەملەكەتتىك راسىمدەردى ورىنداعانى تۋرالى سوڭعى جازباشا حابارلامانى العاننان كەيىن 30 كۇن وتكەن سوڭ كۇشىنە ەنەدى.
