قازاقستان مەن رەسەيدىڭ دامۋ جولدارىن ءوز بەتىنشە ءارى دەربەس تاڭداۋى قوس تاراپقا كەدەرگى كەلتىرمەيدى - توقايەۆ
قازاقستان مەن رەسەيدىڭ دامۋ جولدارىن ءوز بەتىنشە ءارى دەربەس تاڭداۋى قوس تاراپقا كەدەرگى كەلتىرمەيدى.
بۇل تۋرالى اقوردادا رەسەي فەدەراتسياسىنىڭ پرەزيدەنتى ۆلاديمير پۋتينمەن كەڭەيتىلگەن قۇرامدا كەلىسسوز وتكىزگەن مەملەكەت باسشىسى قاسىم- جومارت توقايەۆ ايتتى، دەپ حابارلايدى Kazinform.
مەملەكەت باسشىسىنىڭ ايتۋىنشا، رەسەي پرەزيدەنتىنىڭ قازاقستانعا ساپارى ەكى ەل اراسىنداعى قارىم- قاتىناستى دامىتۋ پەرسپەكتيۆاسىن ايقىنداۋ تۇرعىسىنان ەرەكشە مانگە يە. بۇگىندە ستراتەگيالىق سەرىكتەستىك جانە وداقتاستىق رۋحىنداعى ەكىجاقتى ىنتىماقتاستىق بارلىق باعىتتا تابىستى دامىپ كەلەدى.
«ەكى ەلدىڭ دامۋ جولدارىن ءوز بەتىنشە ءارى دەربەس تاڭداۋى قوس تاراپقا كەدەرگى كەلتىرمەيدى، كەرىسىنشە، بۇل تەڭ قۇقىلى جانە ءوزارا ءتيىمدى ارىپتەستىكتىڭ پايدالى جاعىن ەسەلەي تۇسەدى. مۇنى قازاقستاندا دا، رەسەيدە دە جاقسى تۇسىنەدى، - دەدى پرەزيدەنت.
قاسىم- جومارت توقايەۆ بىرلەسكەن كۇش- جىگەردىڭ ارقاسىندا قازاقستان مەن رەسەي اراسىنداعى شەكارا ەكى ەل ەكونوميكالارىنىڭ يگىلىگى ءۇشىن بەلسەندى جۇمىس ىستەپ جاتقانىنا نازار اۋداردى. مۇنىڭ ناقتى پايداسىن شەكارا ماڭىنداعى وڭىرلەردە تۇراتىن 25 ميلليونعا جۋىق ادام سەزىنىپ وتىر.
«عاسىرلار بويى ءبىر- بىرىمەن قوڭسىلاس ءومىر سۇرگەن اتا- بابالارىمىز دوستىق، سەنىم مەن تاتۋ كورشىلىك قارىم- قاتىناستىڭ مىزعىماس قۇندىلىقتارىن بىزگە امانات ەتتى. ءبىز بۇل قۇندىلىقتاردى ساقتاپ، كەلەسى ۇرپاققا جەتكىزۋىمىز كەرەك»، - دەدى پرەزيدەنت.
كەلىسسوز بارىسىندا تاراپتار ەكىجاقتى ەكونوميكالىق كۇن ءتارتىبىنىڭ نەگىزگى اسپەكتىلەرىن جان- جاقتى تالقىلادى. سونداي- اق الداعى ىنتىماقتاستىقتىڭ نەگىزگى باعىتتارىن ايقىنداپ، دەنساۋلىق ساقتاۋ، ەنەرگەتيكا، كولىك، اۋىل شارۋاشىلىعى، سپورت جانە تاعى دا باسقا سالالارداعى ىقپالداستىقتى نىعايتۋدى كوزدەيتىن ءبىرقاتار ۋاعدالاستىققا قول جەتكىزدى.
