قازاقستان مەن قىتايدىڭ سپورت سالاسىنداعى باسشىلارى حاربيندە كەزدەستى
استانا. KAZINFORM - قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين مەن ق ر تۋريزم جانە سپورت ءمينيسترى ەربول مىرزابوسىنوۆ قىتاي حالىق رەسپۋبليكاسىنىڭ (ق ح ر) باس مەملەكەتتىك دەنە شىنىقتىرۋ جانە سپورت باسقارماسىنىڭ ءمينيسترى، قىتاي وليمپيادالىق كوميتەتىنىڭ پرەزيدەنتى جانە حالىقارالىق ۋشۋ فەدەراتسياسىنىڭ باسشىسى گاو چجيدانمەن كەزدەستى.
كەزدەسۋ حاربين-2025 قىسقى ازيا ويىندارىن ۇيىمداستىرۋ كوميتەتىنىڭ رەسمي قابىلداۋى اياسىندا ءوتتى.
تاراپتار ەكى ەل اراسىنداعى سپورتتى دامىتۋ سالاسىنداعى ىنتىماقتاستىق ءۇشىن ءوزارا العىس ءبىلدىرىپ، ونى ودان ءارى نىعايتۋعا نيەتتى ەكەندەرىن مالىمدەدى.
قازاقستاندىق دەلەگاتسيا قىتاي وكىلدەرىنە قوناقجايلىلىق ءۇشىن ريزاشىلىعىن ءبىلدىرىپ، اشىلۋ راسىمىنە شاقىرعانى جانە ازيا ويىندارىن جوعارى دەڭگەيدە ۇيىمداستىرعانى ءۇشىن العىس ايتتى.
- مۇنداي اۋقىمدى كەشەندى جارىستاردى وتكىزۋ ءاردايىم ۇلكەن جاۋاپكەرشىلىكتى تالاپ ەتەدى. حاربين-2025 قىسقى ازيا ويىندارىنىڭ ۇيىمداستىرۋشىلارىنا قوناقجايلىلىعى مەن ۇيلەسىمدى جۇمىسى ءۇشىن العىسىمىزدى بىلدىرەمىز. ءبىز ويىنداردىڭ باسىنان بەرى وسىندامىز جانە ۇيىمداستىرۋ كوميتەتىنىڭ ءوز مىندەتتەرىن ۇلكەن جاۋاپكەرشىلىكپەن ورىنداپ جاتقانىن كورىپ وتىرمىز. مۇنى لوگيستيكالىق قامتاماسىز ەتۋدەن باستاپ، تەحنيكالىق قولداۋ دەڭگەيى مەن ەرىكتىلەردىڭ ۇيلەسىمدى ارەكەتتەرىنەن انىق بايقاۋعا بولادى، - دەدى گەننادي گولوۆكين.
ەسكە سالا كەتەيىك، IX قىسقى ازيا ويىندارى-2025 حاربيندە 7-14-اقپان ارالىعىندا وتۋدە. قازىرگى تاڭدا قازاقستان قۇراماسىنىڭ قورجىنىندا توعىز جۇلدە بار: ءبىر التىن، بەس كۇمىس جانە ءۇش قولا مەدال.
