قازاقستان مەن قىتايدىڭ سۋ ۆەدومستۆولارى العاش رەت سۋ رەسۋرستارى سالاسىندا مەموراندۋمعا قول قويدى
استانا. KAZINFORM - قازاقستان مەن قىتايدىڭ سۋ ۆەدومستۆولارى العاش رەت سۋ رەسۋرستارى سالاسىندا ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويدى. بۇل تۋرالى ق ر سۋ رەسۋرستارى جانە يرريگاتسيا مينيسترلىگى ءمالىم ەتتى.
بەيجىڭدە ق ر پرەمەر-ءمينيسترىنىڭ ءبىرىنشى ورىنباسارى رومان سكليار مەن ق ح ر مەملەكەتتىك كەڭەسى پرەمەرىنىڭ ورىنباسارى دين سيۋەسياننىڭ توراعالىعىمەن وتكەن قازاقستان-قىتاي ىنتىماقتاستىق كوميتەتىنىڭ XII وتىرىسىندا ءتيىستى كەلىسىمگە قول قويىلدى.
مەموراندۋمعا ق ر سۋ رەسۋرستارى جانە يرريگاتسيا ۆيتسە-ءمينيسترى نۇرلان الدامجاروۆ پەن ق ح ر سۋ شارۋاشىلىعى ءمينيسترىنىڭ ورىنباسارى لي ليانشەن قول قويدى. قۇجات سۋدى ۇتىمدى جانە تۇراقتى پايدالانۋ، زاماناۋي تەحنولوگيالاردى ەنگىزۋ، بالامالى سۋ كوزدەرىن ءبولۋ جانە ونى يگەرۋ، سونداي-اق تاجىريبە الماسۋ جانە بىرلەسىپ مامان دايارلاۋ باعىتتارىنداعى ەكىجاقتى ىنتىماقتاستىقتى نىعايتۋدى كوزدەيدى.
-ءبىر جىل بۇرىن مەنىڭ ق ح ر- عا جۇمىس ساپارىم اياسىندا ءبىز قىتاي تاراپىمەن ىنتىماقتاستىق جانە ءوزارا تۇسىنىستىك تۋرالى مەموراندۋمعا قول قويۋ تۋرالى ۋاعدالاستىق. قوس تاراپ بىردەن كەلىسىم جوباسىن ازىرلەۋگە كىرىستى. سۋ رەسۋرستارى ماسەلەلەرىندەگى ىنتىماقتاستىق ماڭىزدى رەسۋرستى ءتيىمدى پايدالانۋعا، سۋدى ەسەپكە الۋ مەن ۇنەمدەۋدىڭ وزىق تەحنولوگيالارىن ەنگىزۋگە، سۋ سالاسى ماماندارىنىڭ بىلىكتىلىگىن ارتتىرۋعا ىقپال ەتەدى، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
