قازاقستان مەن قىتاي شەكارا بەكەتتەرىنىڭ اراسىندا ەكى شاقىرىم ەمەس ەكى عاسىر الشاقتىق بار - قازىبەك يسا
استانا. KAZINFORM - ءماجىلىس دەپۋتاتى باقتى كەدەنىنىڭ ءبىر جىلدىق وتكىزۋ قابىلەتى 21900 كولىكتەن اسپايدى. جاڭا ينفراقۇرىلىم سالىنعاننان كەيىن بۇل كورسەتكىش 182500 كولىككە جەتۋ كەرەك ەكەنىن ايتتى.
- شەكارانىڭ ار جاعىندا قىتايدىڭ جاي اۋىلىنىڭ وزىندە كوكپەن تالاسقان ءزاۋلىم عيماراتتار قازاقستان جاقتاعى قۇرىلىسى بىتپەي، شاڭى شىعىپ جاتقان كەدەي كەدەن مەن جالعىز بۋدكاعا شەكەسىنەن قاراپ، قاسقايىپ تۇر. ءبىز جاقتا كوزگە ىلىنەر ءبىر عيمارات جوق. قازاق ەلى مەن قىتايدىڭ شەكارا بەكەتتەرىنىڭ اراسىندا ەكى شاقىرىم ەمەس ەكى عاسىر جاتىر، - دەدى قازىبەك يسا.
ونىڭ مالىمەتىنشە، باقتى كەدەنىنىڭ ءبىر جىلدىق وتكىزۋ قابىلەتى 21900 كولىكتەن اسپايدى. جاڭا ينفراقۇرىلىم سالىنعاننان كەيىن بۇل كورسەتكىش 182500 كولىككە جەتۋ كەرەك. قۇرىلىستىڭ كەشىگۋى سالدارىنان ءبىر جىلدىڭ وزىندە 160600 كولىك شەكارادان وتپەي، قازىناعا بىرنەشە ميلليارد تەڭگە تۇسپەي قالعان.
- ترانزيتتىك كولىكتەردىڭ 90 پايىزى رەسەي مەن بەلارۋس كومپانيالارىنا، ولاردىڭ قازاقستاندا تىركەلگەن فيرمالارىنا تيەسىلى. قازاقستاندىق كولىكتەردىڭ وزىندە جۇرگىزۋشىلەر - شەتەل ازاماتتارى. سوندا 16 ميلليارد تەڭگە شىعىندالعان كەدەن قۇرىلىسى قىزىعىن ءوزىمىز ەمەس، شەتەلدىكتەر كورسىن دەپ سالىپ جاتىرمىز با، - دەپ سۇرادى دەپۋتات.
سونداي-اق، ول باتىس قازاقستاننىڭ قازتالوۆ اۋدانىنداعى رەسەيمەن اراداعى 81 شاقىرىم شەكارا دۇرىس قورشالماعاندىقتان ءبىر قىستا 1,5 مىڭ مال شەكارادان ءوتىپ كەتكەن.
- شىعىس قازاقستاننىڭ قاتون- قاراعاي اۋدانىندا دا قانشاما قورشاۋسىز شەكارادان قانشاما مال كورشى ەلگە ءوتىپ كەتىپ، قايتپاي جاتىر؟ !
مالىنان ايرىلا بەرگەن سوڭ مالشىلار «شەكارانى ءوزىمىز سالىپ الامىز» دەپ جۇرسە، سوندا «شەكارانى شەگەندەپ تاس قىلىپ تاستادىق» دەگەنىمىز قايدا، - دەدى قازىبەك يسا.
بۇعان دەيىن قىركۇيەك ايىندا قازاقستان شەكاراسىندا زاڭسىز تاۋار وتكىزۋگە قاتىستى 1300 دەن استام فاكتى اشكەرەلەنگەنىن جازعان ەدىك.
