قازاقستان مەن قىتاي باسشىلارى قىتايداعى قازاقستان تۋريزمى جىلىنا وراي قۇتتىقتاۋ جولدادى
استانا. KAZINFORM - «سينحۋا» اقپارات اگەنتتىگىنىڭ حابارلاۋىنشا، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن ق ح ر ءتوراعاسى شي جينپيڭ قىتايداعى قازاقستان تۋريزمى جىلىنىڭ اشىلۋ سالتاناتىنا قۇتتىقتاۋ حات جولدادى.
قازاقستان پرەزيدەنتى قۇتتىقتاۋ حاتىندا كورشىلەس، دوستاس ەلدەر رەتىندە قازاقستان مەن قىتاي ءوزارا ساياسي سەنىمدى تۇراقتى تۇردە تەرەڭدەتىپ، ءتۇرلى سالالارداعى ىنتىماقتاستىقتا زور جەتىستىكتەرگە قول جەتكىزگەنىن، قازىرگى ۋاقىتتا قوس تاراپ ەكىجاقتى قارىم-قاتىناستاردىڭ «جاڭا التىن وتىز جىلىن» اشۋ ءۇشىن بىرلەسىپ جۇمىس ىستەپ جاتقانىن اتاپ ءوتتى.
سونداي- اق كوپجىلدىق تاريحى مەن سۇيكىمدى تابيعاتى، حالقىنىڭ قوناقجايلىلىعى قازاقستاندى قىتايلىق ساياحاتشىلار ءۇشىن ەڭ جاقسى تۋريستىك مەكەنگە اينالدىراتىنىن ايتتى.
سونىمەن قاتار قىتايداعى قازاقستان تۋريزمى جىلى اياسىندا قازاقستان ءبىرقاتار ءىس-شارا وتكىزەتىنىن، ولار قىتايلىق تۋريستەرگە قازاقستان تۋرالى كوبىرەك بىلۋگە، قازاقستان مەن قىتاي اراسىنداعى ماڭگىلىك دوستىقتى ودان ءارى نىعايتۋعا، سونداي-اق ەكى ەل اراسىنداعى جان-جاقتى ستراتەگيالىق ارىپتەستىك قارىم-قاتىناسقا جاڭا سەرپىن بەرەتىنە سەنىم ءبىلدىردى.
ق ح ر ءتوراعاسى شي جينپيڭ قۇتتىقتاۋ حاتىندا قىتاي مەن قازاقستاننىڭ تاتۋ كورشى، بەرىك دوس، جاقسى ارىپتەس ەكەنىنە توقتالدى. ەكى ەل اراسىندا مىڭداعان جىلعا سوزىلعان دوستىق تاريحى بار ەكەنىن، ەكى ەل حالىقتارى ايگىلى جىبەك جولىن بىرلەسىپ قالىپتاستىرعانىن باسا ايتتى.
شي جينپيڭ 2013 -جىلى قازاقستاندا العاش رەت «جىبەك جولى ەكونوميكالىق بەلدەۋى» باستاماسىن ۇسىنعانىن ەسكە سالىپ، ەكى ەلدىڭ «ءبىر بەلدەۋ - ءبىر جول» جوسپارىنىڭ دامۋى مەن وركەندەۋىنە بىرلەسە ىقپال ەتكەنىن اتاپ كورسەتتى.
شي جينپيڭ قازاقستاننىڭ تۋريزم جىلى ەكى حالىقتى ءبىر-بىرىنە جاقىنداستىرۋدىڭ، ەكى ەل اراسىنداعى «جاڭا التىن وتىز جىلدى» باستاۋدىڭ جانە قازاقستان-قىتاي ورتاق بولاشاعىن بىرلەسىپ قۇرۋ جولىندا زور ۇلەس قوسۋدىڭ ماڭىزدى مۇمكىندىگى بولادى دەپ كۇتەتىنىن ايتتى.
وسىعان دەيىن قىتايداعى قازاقستان تۋريزمى جىلىنا وراي ەسترادا جۇلدىزدارى بەيجىڭدە ونەر كورسەتكەنىن جازدىق.
ايتا كەتسەك، جىلدىڭ رەسمي اشىلۋى حالىقارالىق تۋريزم مەن ينۆەستيتسيالارعا ارنالعان فورۋمنان باستالىپ، قازاقستاننىڭ كورمەسى جانە ەتنو-اۋىلداعى مادەني ءىس-شارالارمەن جالعاستى. قازاقستان دەلەگاتسياسى قاتارىندا مينيسترلىك، تۋريزم، بيزنەس، سپورت پەن ونەر سالاسىنىڭ وكىلدەرى بار.
اۆتور
مۇقتار مۇرات
