قازاقستان مەن قىتاي اراسىنداعى ساۋدا اينالىمى 30 جىلدا 100 ەسە وسكەن
استانا. KAZINFORM - پرەزيدەنت قاسىم-جومارت توقايەۆ قىتاي حالىق رەسپۋبليكاسىنىڭ ءتوراعاسى شي جينپيڭنىڭ قازاقستانداعى ساپارى قارساڭىندا شينحۋا اگەنتتىگىنە بەرگەن سۇحباتىندا قىتايداعى ستۋدەنتتىك شاعىن جىلى لەبىزبەن ەسكە الدى.
«قىتاي حالىق رەسپۋبليكاسى ساۋدا مەن ينۆەستيتسيا سالاسىندا قازاقستاننىڭ جەتەكشى سەرىكتەسى رەتىندەگى ورنىن ساقتاپ وتىر. 30 جىلدان اساتىن قارىم- قاتىناستىڭ ارقاسىندا قوس ەلدىڭ اراسىنداعى ساۋدا اينالىمى 100 ەسە ءوسىپ، 2023 -جىلى 41 ميلليارد دوللارعا جەتتى. بۇل تاريحي رەكورد بولىپ ەسەپتەلەدى. وتكەن جىلدىڭ قورىتىندىسى بويىنشا قىتاي قازاقستانداعى ءىرى ينۆەستورلاردىڭ العاشقى تورتتىگىنە ەندى. 2023 -جىلى بۇل ەل 2 ميلليارد دوللارعا جۋىق تىكەلەي ينۆەستيتسيا سالعان. بۇل 2022 -جىلدىڭ كورسەتكىشىنەن 16,4 كوپ. جالپى قازاقستان ەكونوميكاسىنداعى قىتاي ينۆەستيتسياسىنىڭ جيىنتىق كولەمى 25 ميلليارد دوللاردان استى»، - دەدى مەملەكەت باسشىسى.
بۇگىندە قازاقستاندا 4700 دەي قازاق- قىتاي بىرلەسكەن كاسىپورنى جۇمىس ىستەيدى.
«بۇدان بولەك قارجى سەكتورىنداعى بىرلەسكەن قىزمەتىمىزدىڭ اياسىن كەڭەيتپەكشىمىز. ول ءۇشىن «استانا» حالىقارالىق قارجى ورتالىعىنىڭ مۇمكىندىكتەرىن پايدالانامىز. بۇگىندە بۇل ورتالىقتا 78 ەلدەن 2800 گە جۋىق شەتەلدىك كومپانيا تىركەلگەن. ونىڭ وننان ءبىر بولىگى قىتايدان»، - دەدى پرەزيدەنت.
قاسىم-جومارت توقايەۆ قىتاي تارابىنىڭ «ءبىر بەلدەۋ، ءبىر جول» مەگاجوباسىن تۇتاستاي قولدايتىنىن ايتتى.
«ءبىز الدىمىزعا قىتايمەن اراداعى كوپقىرلى قارىم- قاتىناستى ارى قاراي تەرەڭدەتۋ باعىتىندا ءورشىل جوسپارلار قويىپ وتىرمىز. وعان قاجەتتى العىشارتتار مەن جاعدايدىڭ ءبارىن جاساپ جاتىرمىز. ءوزارا ىقپالداستىقتىڭ قازىرگى جوعارى قارقىنىن ەسكەرسەك، اراداعى ساۋدا اينالىمىن 100 ميلليارد دوللارعا جەتكىزۋ تولىقتاي قول جەتكىزۋگە بولاتىن مەجە»، - دەدى مەملەكەت باسشىسى.
