قازاقستان مەن قىرعىزستان شەكاراسىندا تەكسەرىس ازايادى - مەملەكەت باسشىسى
استانا. KAZINFORM - ترانسشەكارالىق سۋ رەسۋرستارىن ءتيىمدى ءارى ءادىل پايدالانۋدىڭ وزەكتىلىگى ارتا ءتۇستى.
بۇل تۋرالى بۇگىن اقوردادا قىرعىزستان پرەزيدەنتى سادىر جاپاروۆپەن كەلىسسوزدەن كەيىنگى بىرلەسكەن مالىمدەمە كەزىندە قازاقستان پرەزيدەنتى قاسىم-جومارت توقايەۆ ايتتى.
«شەكارادا سالىنىپ جاتقان ساۋدا-لوگيستيكا، يندۋستريالىق كەشەننىڭ قۇرىلىسىن تالقىلادىق. ونى كوپكە ءسوزباي تەز ارادا ىسكە قوسىمىز دەپ كەلىستىك. بۇل قادام وندىرىستىك بايلانىستى جانە ساۋدا-ساتتىقتى جانداندىرماق. بۇدان بولەك، اگروونەركاسىپ سەكتورىنداعى مۇمكىندىكتەردى تالقىلادىق. بىلتىر ەكى مەملەكەتتىڭ وسى سالاداعى تاۋار اينالىمى 10 پايىزعا ارتىپ، 300 ميلليون دوللارعا جەتتى. ءبىزدىڭ ەلدەرىمىز ءۇشىن ءونىم كولەمىن ۇلعايتۋ، بىرلەسكەن كاسىپورىندار اشۋ، عىلىمي- زەرتتەۋ ينستيتۋتتارى اراسىندا بايلانىس ورناتۋ وتە ماڭىزدى. وسى ورايدا ەكى ەلدىڭ ۇكىمەتىنە جول كارتاسىن قابىلداۋ تۋرالى تاپسىرما بەرىلدى»، - دەدى قاسىم- جومارت توقايەۆ.
مەملەكەت باسشىسىنىڭ ايتۋىنشا، جاھاندىق نارىقتاعى تۇراقسىزدىق جاعدايىندا ازىق- تۇلىك قاۋىپسىزدىگىن قامتاماسىز ەتۋگە نازار اۋدارىلدى. بۇگىن قابىلدانعان شەشىمدەر بۇل ىسكە ايتارلىقتاي ىقپال ەتەدى.
«قازاق ينۆەستورلارى قىرعىز ەكونوميكاسىنىڭ ماڭىزدى سەكتورلارىن دامىتۋعا، الەۋمەتتىك احۋالدى جاقسارتۋعا ۇلەس قوسىپ كەلەدى. ماسەلەن، قازاقستان كاسىپكەرلەرىنىڭ قارجىسىنا ىستىقكول وبلىسىندا كۇن ەنەرگياسى ستانتسياسىن سالۋ جوسپارلانعان. بۇدان بولەك، جالالاباد وبلىسىندا فەرروقورىتپا زاۋاتىن سالۋ جونىندە كەلىسسوز ءجۇرىپ جاتىر. بىرلەسكەن كاسىپورىندار ءتيىمدى جۇمىس ىستەۋى ءۇشىن قولايلى جاعداي جاساۋعا كەلىستىك. وسى ورايدا بۇگىن ءوزارا ينۆەستيتسيالاردى قورعاۋ جونىندەگى كەلىسىمگە قول قويىلدى. سونداي-اق ەلەكتروندى ۇكىمەت جۇيەسىن ەنگىزۋگە جانە دامىتۋعا ۋاعدالاستىق. ەكونوميكانى تسيفرلاندىرۋ ءۇشىن تاجىريبە الماسۋ جانە اقپارات سالاسىنداعى ىنتىماقتاستىقتى نىعايتۋ تۋرالى كەلىستىك. ەكى ەل اراسىنداعى الىس- بەرىستى جانداندىرۋ - ماڭىزدى مىندەتتىڭ ءبىرى. بۇل تۇرعىدا شەكارا ارقىلى جۇك وتكىزۋ مۇمكىندىگىن ارتتىرۋ جانە ونى راسىمدەۋدى جەتىلدىرۋ ءۇشىن ناقتى شارالار قابىلدانىپ جاتىر»، - دەدى پرەزيدەنت.
سونىمەن قاتار قاسىم-جومارت توقايەۆ بۇگىن اقوردادا اۆتوبەكەتتەردى دامىتۋ تۋرالى ءىس- شارالار جوسپارىنا قول قويىلعانىن ەسكە سالدى. باستى ماقسات -شەكاراداعى تەكسەرىستى ازايتىپ، كولىك كەپتەلىسىن جويۋ. بۇل جۇمىس ەكى ەل ۇكىمەتتەرىنىڭ ەرەكشە باقىلاۋىندا بولادى
«كەلەسى ماڭىزدى باعىت - سۋ ەنەرگەتيكا سالاسىنداعى قارىم-قاتىناستى ۇيلەستىرۋ. سوڭعى جىلدارى ترانسشەكارالىق سۋ رەسۋرستارىن ءتيىمدى ءارى ءادىل پايدالانۋدىڭ وزەكتىلىگى ارتا ءتۇستى. وسى ورايدا ءوزارا ۇيلەسىمدى جۇمىستى جالعاستىرامىز دەپ كەلىستىك. بۇل باعىتتاعى تۇيىتكەلدەردى تەزىرەك شەشۋ ءۇشىن بىرلەسكەن شارالار قابىلداۋ قاجەت. سوندىقتان مەملەكەتارالىق سۋ شارۋاشىلىعى قۇرىلىمدارىنىڭ جۇمىس كەستەسىن جاقىن ارادا بەكىتۋگە جانە ونى ۋاقىتىلى ورىنداۋعا ۋاعدالاستىق. قازاقستان بارلىق مىندەتتەمەنى تولىق ورىنداۋعا جانە ماڭىزدى جوبالاردى بىرلەسە ىسكە اسىرۋعا دايىن»، - دەدى مەملەكەت باسشىسى.
