قازاقستان مەن مالايزيا قۇنى 350 ميلليون دوللار بولاتىن جوبالار بويىنشا كەلىسىمگە قول قويدى
استانا. KAZINFORM - ەلوردادا ۇكىمەت باسشىسى ولجاس بەكتەنوۆ پەن مالايزيا پرەمەر-ءمينيسترى انۋار يبراگيم ەكى ەلدىڭ بيزنەس-قوعامداستىقتارى مەن عىلىمي توپتارى وكىلدەرىنىڭ قاتىسۋىمەن قازاقستان-مالايزيا ينۆەستيتسيالىق دوڭگەلەك ۇستەلىن وتكىزدى.
جيىندا ەكونوميكانىڭ باسىم سالالارىنداعى ىنتىماقتاستىقتى ارتتىرۋ پەرسپەكتيۆالارى تالقىلاندى. قازاقستان ۇكىمەتىنىڭ باسشىسى ءوز كەزەگىندە مالايزيا ەلىمىزدىڭ وڭتۇستىك- شىعىس ازياداعى نەگىزگى ساۋدا- ەكونوميكالىق ارىپتەستەردىڭ ءبىرى ەكەنىن اتاپ ءوتتى. ءبىر جىل ىشىندە ەكىجاقتى تاۋار اينالىمى $150 ميلليوننان شامامەن $245 ميلليونعا دەيىن وسكەنىن تىلگە تيەك ەتىپ، ەندىگى ماقسات ەكونوميكالاردىڭ قولدا بار الەۋەتىن اشۋ جانە ەكىجاقتى ساۋدا كورسەتكىشىن پاندەمياعا دەيىنگى $650 ميلليوننان اسىرۋ ەكەنىن ايتتى.
«ءبىزدىڭ مەملەكەتتەرىمىزدىڭ اراسىنداعى تىعىز ساياسي ديالوگ ءوزارا سەرىكتەستىكتىڭ بەرىك نەگىزىن قالايدى. ەلىمىزدىڭ پرەزيدەنتى قاسىم-جومارت توقايەۆ پەن ءسىزدىڭ كەشەگى كەزدەسۋىڭىز ەكىجاقتى قارىم- قاتىناستاردىڭ دامۋىنداعى ماڭىزدى تاريحي كەزەڭ بولدى. قازاقستان ۇكىمەتى جوعارى دەڭگەيدە قابىلدانعان بارلىق ۋاعدالاستىقتاردى ىسكە اسىرۋعا دايىن ەكەنىن بىلدىرەدى»، - دەپ اتاپ ءوتتى ولجاس بەكتەنوۆ.
ولجاس بەكتەنوۆ قازاقستاننىڭ مالايزياعا ەكسپورتتى ءارتاراپتاندىرۋ نيەتى تۋرالى مالىمدەپ، مالايزيالىق كاسىپكەرلەردى قىزمەت كورسەتۋ، وڭدەۋ ونەركاسىبى، قارجى، ءبىلىم بەرۋ، جەر قويناۋىن پايدالانۋ، اۋىل شارۋاشىلىعى جانە قۇرىلىس سالالارىنداعى سەرىكتەستىگىن نىعايتۋدىڭ جاڭا مۇمكىندىكتەرىن بىرلەسىپ زەردەلەۋگە شاقىردى. بۇگىندە قازاقستاندا مالايزيالىق كاپيتالدىڭ قاتىسۋىمەن 48 كومپانيا جۇمىس ىستەيدى. جالپى سوماسى $410 ميلليوننان استام 17 بىرلەسكەن ينۆەستيتسيالىق جوبا ىسكە اسىرىلۋدا.
ءوز كەزەگىندە مالايزيا پرەمەر- ءمينيسترى انۋار يبراگيم مەملەكەتارالىق ءىس- قيمىلدىڭ وڭ ديناميكاسىن اتاپ ءوتتى. سوڭعى جىلدارى ەكى ەل اراسىنداعى تاۋار اينالىمىنىڭ ءوسىمى %30- دان استى. مالايزيا قازاقستانمەن تۋريزم، ءبىلىم بەرۋ، ەنەرگەتيكا سالالارىندا، سونداي-اق قازاقستاندىق حالال ونىمدەردى جەتكىزۋ سالاسىندا ىنتىماقتاستىقتى نىعايتۋعا نيەتتى. بۇدان باسقا، الەۋەتى باسىم باعىتتار بويىنشا بىرلەسكەن جوبالار سانىن كوبەيتۋ قاجەتتىگى اتاپ ءوتىلدى.
دوڭگەلەك ۇستەلگە قاتىسۋشىلارعا قازاقستاندا ەلىمىزدىڭ ينۆەستيتسيالىق تارتىمدىلىعىن ارتتىرۋ جونىندەگى جۇيەلى شارالاردىڭ ىسكە اسىرىلۋى تۋرالى ايتىلدى. ينۆەستورلارعا سالىق جانە كەدەندىك جەڭىلدىكتەر بەرىلەدى، كونسالتينگتىك جانە ينفراقۇرىلىمدىق قولداۋ كورسەتىلۋدە.
دوڭگەلەك ۇستەل اياسىندا قازاقستاندىق جانە مالايزيالىق بيزنەس وكىلدەرى ناقتى كەلىسسوزدەر جۇرگىزدى. مالايزيا پارلامەنتىنىڭ سەناتورى، ۇلتتىق كاسىپكەرلەر جانە يندۋستريا پالاتاسىنىڭ (NCCIM) پرەزيدەنتى لوۋ كيان چۋان قازاقستاننىڭ مالايزيانىڭ ورتالىق ازيا ايماعىنداعى ماڭىزدى ءارى ەڭ ۇلكەن ستراتەگيالىق سەرىكتەسى ەكەنىن اتاپ ءوتتى.
دوڭگەلەك ۇستەل الاڭدارىندا ينۆەستيتسيالىق بايلانىستاردى تەرەڭدەتۋ جانە جاڭا نارىقتاردى بىرلەسىپ يگەرۋ تۋرالى ۋاعدالاستىققا قول جەتكىزىلدى جانە جالپى سوماسى $350 ميلليون اساتىن كەلىسىمدەر مەن مەموراندۋمدارعا قول قويىلدى. يسلام قارجىسىن جانە ساۋدانى دامىتۋ، سونداي-اق ازىق-تۇلىك ونەركاسىبى، تاۋ-كەن سالالارىنا ينۆەستيتسيالار تارتۋ، التىن وڭدەۋ جانە ترانسفورماتور مەن اۆتوموبيل مايىن بىرلەسىپ ءوندىرۋ سالالارىندا ىنتىماقتاستىق ورناتۋ جوسپارلانعان.
ۋاعدالاستىقتاردى جۇزەگە اسىرۋ ەكى ەلدىڭ تابىستى ىنتىماقتاستىقتىعىن كەڭەيتۋ جولىنداعى ماڭىزدى قادام بولماق.
اۆتور
ابىلايحان جۇماشيەۆ
