قازاقستان مەن ماجارستان ءبىلىم سالاسىندا ءوزارا تۇسىنىستىك تۋرالى مەموراندۋمعا قول قويدى
قازاقستان پرەزيدەنتى مەن ماجارستان پرەمەر-ءمينيسترى ەكى مەملەكەتتىڭ رەسمي دەلەگاتسيالارىنىڭ قاتىسۋىمەن كەڭەيتىلگەن قۇرامدا كەلىسسوز جۇرگىزدى، دەپ حابارلايدى Kazinform اقورداعا سىلتەمە جاساپ.
قاسىم-جومارت توقايەۆ قازاقستان مەن ماجارستاننىڭ تاريحي تامىرلاستىعى جانە تىعىز بايلانىستارى بۇگىندە ەكى ەل اراسىنداعى ىنتىماقتاستىقتىڭ تەرەڭدەي تۇسۋىنە نەگىز بولعانىن اتاپ ءوتتى.
- قازاق پەن ماجار - ەجەلدەن سىيلاستىعى جاراسقان تۋىستاس، دوستاس حالىقتار. ەكى ەلدىڭ ءتىلى، سالت-ءداستۇرى مەن مادەنيەتى ۇقساس. ورتا عاسىرلاردا تورعاي دالاسىنان ەۋروپاعا قونىس اۋدارعان قىپشاق تايپالارىنىڭ ۇرپاقتارى بۇگىندە ماجارستان اۋماعىندا ءومىر ءسۇرىپ جاتىر. ءبىز مۇنى ماقتان تۇتامىز. بىرلەسكەن كۇش-جىگەرىمىزدىڭ ارقاسىندا قازاق-ماجار ىقپالداستىعى بارلىق سالادا قارقىندى دامۋدا. بۇعان، قۇرمەتتى پرەمەر-مينيستر مىرزا، ءسىز ولشەۋسىز ۇلەس قوسىپ كەلەسىز. ءبىز باۋىرلاستىعىمىزدى، ءوزارا ءتيىمدى قارىم-قاتىناستى ودان ءارى تەرەڭدەتۋگە مۇددەلىمىز. بۇگىنگى كەلىسسوزدەر ەكىجاقتى ستراتەگيالىق سەرىكتەستىكتى ودان ءارى دامىتۋعا تىڭ سەرپىن بەرەدى دەپ سەنەمىن، - دەدى پرەزيدەنت.
قاسىم-جومارت توقايەۆ قازاقستان مەن ماجارستان اراسىندا ەكىجاقتى ىنتىماقتاستىقتى ودان ءارى دامىتۋ ءۇشىن جاقسى ينستيتۋتسيونالدى نەگىز بار دەپ سانايدى. مەملەكەت باسشىسىنىڭ پىكىرىنشە، ەكونوميكالىق ىنتىماقتاستىق جونىندەگى ۇكىمەتارالىق كوميسسيا مەن ىسكەرلىك كەڭەس ەكى ەلدىڭ ساۋدا قاتىناستارىن دامىتۋدا بەلسەندى ءرول اتقارۋى كەرەك.
- گەوساياسي شيەلەنىستەرگە قاراماستان، بىلتىر تاۋار اينالىمى 20 پايىزدان استام ءوستى. تاياۋ بولاشاقتا بۇل كورسەتكىشتى 1 ميلليارد دوللارعا دەيىن جەتكىزۋگە تولىق مۇمكىندىگىمىز بار ەكەنىنە سەنىمدىمىن، - دەدى قازاقستان پرەزيدەنتى.
تاراپتار ەنەرگەتيكا، كولىك، لوگيستيكا، مەتاللۋرگيا، وڭدەۋ ونەركاسىبى، اۋىل شارۋاشىلىعى، فارماتسيەۆتيكا، تاماق ونەركاسىبى جانە تۋريزم سياقتى سالالارداعى بايلانىستاردى دامىتۋعا ءوزارا مۇددەلى ەكەنىن ءبىلدىردى.
سونىمەن قاتار كەلىسسوز بارىسىندا ەكى ەلدىڭ زاڭ شىعارۋشى ورگاندارىندا جۇمىس ىستەيتىن دوستىق توپتارى ارقىلى پارلامەنتارالىق بايلانىستى نىعايتۋدىڭ ماڭىزدىلىعى ايتىلدى. سونداي-اق ب ۇ ۇ، ە ق ى ۇ، ت م ۇ جانە ءتۇرلى حالىقارالىق پلاتفورمالار اياسىنداعى ءوزارا ىقپالداستىق پەرسپەكتيۆالارى قاراستىرىلدى.
بۇدان بولەك، مەملەكەت باسشىسى ەكى ەلدىڭ گۋمانيتارلىق بايلانىستارىن نىعايتۋ ماسەلەسىنە دە توقتالدى. بۇگىن استانا كوشەلەرىنىڭ بىرىنە ماجار ۇلتىنىڭ كورنەكتى اقىنى شاندور پەتەفيدىڭ ەسىمى بەرىلەدى. بۇل - قازاقستان مەن ماجارستان اراسىنداعى تىعىز دوستىق قاتىناستاردىڭ تاعى ءبىر ايقىن دالەلى.
ءوز كەزەگىندە ۆيكتور وربان قۇرمەتپەن قارسى العانى ءۇشىن قاسىم-جومارت توقايەۆقا جانە باۋىرلاس قازاقستان حالقىنا العىس ايتتى.
- قۇرمەتتى پرەزيدەنت مىرزا! ءبىز قازاقستانعا ءارقاشان ەرەكشە قۋانىشپەن كەلەمىز. ءبىز مۇندا سوڭعى رەت پاندەمياعا دەيىن بولعان ەدىك. سول كەزدىڭ وزىندە ەكىجاقتى قارىم-قاتىناسىمىز وتە تابىستى دامىدى. ءبىراق كوروناۆيرۋس بارلىق بايلانىستارىمىزدىڭ قارقىنىن تەجەدى. ءبىز بۇگىن ءوزارا ىقپالداستىعىمىزعا تىڭ سەرپىن بەرۋ ءۇشىن كەلدىك. ورتا ازيا ايماعىندا ءبىزدى قازاقستانمەن عاسىرلار بويعى تاريحىمىز بايلانىستىرادى. سوندىقتان سىزدەردىڭ ءاربىر جەتىستىكتەرىڭىزگە قۋانامىز. قازاقستان - تابىستى دامىپ كەلە جاتقان عاجاپ ەل. مەن ءارقاشان قازاقستاننان ۇلكەن اسەرمەن قايتامىن، - دەدى ماجارستان پرەمەر-ءمينيسترى.
كەلىسسوز قورىتىندىسى بويىنشا ءبىلىم سالاسىنداعى ءوزارا تۇسىنىستىك تۋرالى مەموراندۋمعا قول قويىلدى.
