قازاقستان مەن ازەربايجان پرەزيدەنتتەرى باكۋدە كەلىسسوز جۇرگىزدى

قاسىم- جومارت توقايەۆ ءداستۇرلى قوناقجايلىعى مەن ب ۇ ۇ- نىڭ ورتالىق ازيا ەلدەرى ەكونوميكالارىنا ارنالعان ارنايى باعدارلاماسىنىڭ (س پ ە ك ا) العاشقى ءسامميتىن ۇيىمداستىرعانى ءۇشىن يلحام اليەۆكە العىس ايتا وتىرىپ، باكۋدى «كاسپيي ءوڭىرىنىڭ ءىنجۋ- مارجانى»، الەمدەگى ەڭ ادەمى قالالاردىڭ ءبىرى دەپ اتادى.

مەملەكەت باسشىسى ورايلى ءساتتى پايدالانىپ، يلحام اليەۆ پەن باۋىرلاس ازەربايجان حالقىن حالىقارالىق قۇقىق جانە ب ۇ ۇ قاۋىپسىزدىك كەڭەسىنىڭ قارارلارىنا ساي ەلدىڭ اۋماقتىق تۇتاستىعىن ساقتاۋعا قول جەتكىزگەنىمەن قۇتتىقتادى. پرەزيدەنت مۇنىڭ ايتۋلى وقيعا ەكەنىنە نازار اۋداردى.

«بۇل ءسىزدىڭ مەملەكەتتىلىكتى نىعايتۋعا، حالقىڭىزدىڭ ءال- اۋقاتىن كوتەرىپ، باكۋدىڭ الەمدىك قوعامداستىقتاعى بەدەلىن ارتتىرۋعا باعىتتالعان مىقتى كوشباسشىلىعىڭىزدىڭ، كورەگەن ءارى دانا ساياساتىڭىزدىڭ ارقاسىندا ىسكە استى. مەنىڭ ويىمشا، بۇل، شىن مانىندە، تاريحي وقيعا»،-دەدى پرەزيدەنت.

مەملەكەت باسشىسى قازاقستان مەن ازەربايجان اراسىنداعى ءوزارا قارىم-قاتىناستىڭ قارقىندى دامىپ كەلە جاتقانىن اتاپ ءوتتى.

«جاڭا جوبالار قولعا الىنىپ جاتىر. ءبىزدىڭ ارامىزدا ەشقانداي تۇيتكىلدى ماسەلە جوق. ءبىز-شىنايى ستراتەگيالىق سەرىكتەسپىز، ءتىپتى، كاسپي تەڭىزىنىڭ ەكى جاعىن مەكەن ەتكەن كورشىلەرمىز. ستراتەگيالىق قاتىناستاردى نىعايتۋ جانە وداقتاستىق ىنتىماقتاستىقتى تەرەڭدەتۋ جونىندەگى بىرلەسكەن دەكلاراتسيانىڭ قابىلدانۋى، سونداي- اق جوعارى مەملەكەتارالىق كەڭەستىڭ قۇرىلۋى قازاق- ازەربايجان قارىم- قاتىناسىن جاڭا دەڭگەيگە كوتەرگەن تاريحي وقيعا بولدى. مەن وزىممەن بىرگە باكۋگە تولىققاندى دەلەگاتسيا الىپ كەلدىم. ويتكەنى بۇگىنگى كەزدەسۋدە، ازەربايجان تاراپىمەن شىن مانىندە، تولىق فورماتتى، مازمۇندى كەلىسسوزدەر جۇرگىزەمىز دەپ سانايمىن. بۇل - ءوزارا قارىم- قاتىناسقا قاتىستى ءبىرقاتار ماسەلە بويىنشا پىكىر الماسۋ ءۇشىن جاقسى مۇمكىندىك»، - دەدى مەملەكەت باسشىسى.

ءوز كەزەگىندە ازەربايجان پرەزيدەنتى سپەكا سامميتىنە قاتىسقانى ءۇشىن قاسىم- جومارت توقايەۆقا العىس ايتتى.

«ءبىز-دوستاس، باۋىرلاس ءارى سەرىكتەس ەلدەرمىز. سوڭعى جىلدارى رەسمي ساپارلار اياسىندا، ەكى ەل ۇكىمەتتەرى مۇشەلەرى مەن كومپانيالارى شەڭبەرىندە ءوزارا بايلانىستاردىڭ قارقىندى تۇردە دامىپ كەلە جاتقانى انىق بايقالادى. ءبىز ەكى مەملەكەت اراسىنداعى ءوزارا ىقپالداستىقتىڭ ەڭ جوعارى دەڭگەيىنە جەتىپ وتىرمىز. بۇل - تاۋەلسىز ەل رەتىندە دامۋ تاريحىمىزداعى ايتۋلى وقيعا جانە حالىقتارىمىز اراسىنداعى بايلانىستاردىڭ رۋحى مەن سيپاتىنا ساي كەلەدى. مۇنىڭ سولاي بولاتىن ءجونى بار»،-دەدى ازەربايجان پرەزيدەنتى.

يلحام اليەۆ قازاقستان پرەزيدەنتىن كەلەسى جىلى ازەربايجانعا مەملەكەتتىك ساپارمەن كەلۋگە شاقىردى.

كەزدەسۋ بارىسىندا مەملەكەتتەر باسشىلارى كاسپيي تەڭىزىنىڭ تابانىمەن تالشىقتى- وپتيكالىق بايلانىس جەلىسىن تارتۋ، ازەربايجان اۋماعى ارقىلى قازاقستان مۇنايىن تاسىمالداۋ كولەمىن ۇلعايتۋ، ترانسكاسپي حالىقارالىق كولىك ءدالىزىن دامىتۋ، سونداي- اق ەنەرگەتيكا مەن جاڭارتىلاتىن ەنەرگيا كوزدەرى سالالارىنداعى پەرسپەكتيۆتى جوبالاردى جۇزەگە اسىرۋ سياقتى ماڭىزدى باعىتتاردا بىرلەسكەن جۇمىستاردى جانداندىرۋ مۇمكىندىكتەرىن تالقىلادى.

باۋىرلاس حالىقتار اراسىنداعى مادەني-گۋمانيتارلىق بايلانىستاردى ودان ءارى نىعايتۋعا باسا ءمان بەرىلدى. جۋىق ارادا قازاقستاندا ازەربايجاننىڭ، ال ازەربايجاندا قازاقستاننىڭ مادەنيەت كۇندەرى ۇيىمداستىرىلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى