قازاقستان مەن اۋستريا ديپلوماتيالىق پاسپورت يەلەرىن ۆيزالىق تالاپتاردان بوساتپاق
استانا. KAZINFORM - اشىق ن ق ا پورتالىندا قازاقستان مەن اۋستريا فەدەرالدى ۇكىمەتتەرى اراسىنداعى ديپلوماتيالىق پاسپورتتاردىڭ يەلەرىن ۆيزالىق تالاپتاردان بوساتۋ تۋرالى كەلىسىم جوباسى جاريالاندى.
كەلىسىم راسىمدەلگەننەن كەيىن قازاقستان رەسپۋبليكاسىنىڭ ازاماتتارى - قولدانىستاعى ديپلوماتيالىق پاسپورتتاردىڭ يەلەرى اۋستريا رەسپۋبليكاسىنىڭ اۋماعىنا ۆيزاسىز كىرە الادى جانە وندا 180 (ءجۇز سەكسەن) كۇن مەرزىمى ىشىندە 90 (توقسان) كۇنگە دەيىن بولا الادى. اۋستريالىق ديپلوماتيالىق پاسپورت يەلەرىنە دە ءدال وسىنداي مۇمكىندىك بەرىلەدى.
قازاقستان رەسپۋبليكاسىنىڭ مەن اۋستريا رەسپۋبليكاسىنىڭ قولدانىستاعى ديپلوماتيالىق پاسپورتتارىنىڭ يەلەرى جاۋاپتى يمميگراتسيالىق بيلىك ورىندارى ايقىنداعان وتكىزۋ پۋنكتتەرى ارقىلى ەكىنشى تاراپتىڭ اۋماعىنا كىرىپ-شىعا الادى. سونىمەن قاتار ولارعا قاۋىپسىزدىك يمميگراتسيالىق، كەدەندىك، مەديتسينالىق جانە باسقا دا قۇقىقتىق نورمالارمەن بايلانىستى جانە وسىنداي قولدانىستاعى پاسپورتتاردىڭ يەلەرىنە زاڭدى تۇردە قولدانىلاتىن شەكتەۋلەردەن وزگە قانداي دا ءبىر شەكتەۋلەر قويىلمايدى.
كەلىسىم جوبا 6-ناۋرىزعا دەيىن قوعامدىق تالقىلاۋعا شىعارىلىپ وتىر.
بۇعان دەيىن Kazinform ءتىلشىسى قازاقستان ءتولقۇجاتىنىڭ قاۋقارىن سارالاپ، قاي ەلمەن قاتىناستا كادەگە جارايتىنىن زەرتتەپ كورگەن ەدى.
