قازاقستان مەن ارمەنيا ۇ ق ش ۇ- دان شىققالى جاتقان جوق - مينيسترلىك
استانا. قازاقپارات - ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ قازاقستان مەن ارمەنيا ۇ ق ش ۇ- دان شىعۋ باعىتىندا كولىسسوز جۇرگىزىپ جاتىر دەگەن قاۋەسەت شىندىققا جاناسپايتىنىن ايتتى، دەپ حابارلايدى قازاقپارات ءتىلشىسى.
«ءبىر اقپارات اگەنتتىگىندە وسىنداي مالىمەت شىعىپتى. بۇل اقپارات شىندىققا جاناسپايدى. ەگەر ارمەنيا ءوز تالاپتارىن قويىپ جاتسا، بۇل ولاردىڭ ىشكى ماسەلەسى. وسى جايىندا ءبىز ەشتەڭە ايتا المايمىز. قازاقستان ۇ ق ش ۇ اياسىندا جۇمىسىن جالعاستىرىپ جاتىر»، - دەدى ا. سمادياروۆ اپتالىق باسپا ءسوز ءماسليحاتىندا تىلشىلەر سۇراعىنا جاۋاپ بەرە وتىرىپ.
بۇل تۇرعىدا رەسمي وكىل قازاقستان كەزىندە ۇجىمدىق قاۋىپسىزدىك تۋرالى شارت ۇيىمىنىڭ قۇرىلۋىنا اتسالىسقانىن ەسكە سالدى.
