قازاقستان كورەيا مەن گرۋزياداعى ازاماتتارىن الدىرۋ ءۇشىن ارنايى بورت جىبەرە مە
استانا. KAZINFORM - سىرتقى ىستەر ءمينيسترىنىڭ ورىنباسارى الىبەك باقايەۆ ساياسي احۋالى شيلەنىسكەن وڭتۇستىك كورەيا مەن گرۋزياداعى قازاقستاندىقتاردىڭ قاۋىپسىزدىگى تۋرالى پىكىر ءبىلدىردى.
- ەلشىلىكتەرىمىز شەت مەملەكەتتەردەگى ازاماتتارىمىزبەن ءارقاشان بايلانىستا بولادى. وڭتۇستىك كورەياداعى جاعدايدى ايتىپ وتىرسىز عوي، جالپى مەنىڭ بىلۋىمشە، قازىر نەگىزگى ساياسي ماسەلە شەشىمىن تاۋىپ وتىر. ءبىزدىڭ سىرتقى ساياساتىمىز ءۇشىنشى مەملەكەتتەردىڭ ىشكى ساياساتىنا ەشقاشان ارالاسپاۋ، ەشقانداي باعا بەرمەۋ قاعيداتىنا باعىنادى. باستى ماقساتىمىز - كورەيادا تۇراتىن ازاماتتارىمىزدى قورعاۋ. ساتىسىنا كەلەتىن بولساق، بۇگىنگى تاڭدا ەكى ارادا ۆيزاسىز رەجيم ورناتىلعان. سوندىقتان 30 مىڭنان استام ازاماتىمىز بار دەگەن ستاتيستيكا بار. ءبىراق كەيبىر كەزدە ءبىزدىڭ كورەياداعى ازاماتتارىمىز ىشكى كوشى-قون زاڭىن بۇزىپ ءجۇر. زاڭسىز دەۋگە دە بولادى. 30 كۇندىك ۆيزا مەرزىمى اياقتالسا دا شىقپاي قالىپ قويىپ جاتادى، - دەدى ول.
سونداي-اق، ءدال قازىر گرۋزيا مەن وڭتۇستىك كورەياعا ارنايى بورت شىعارۋدىڭ قاجەتتىلىگى جوق ەكەنىن ايتتى.
- سىرتقى ىستەر مينيسترلىگى ءتيىستى مەملەكەتتىك ورگاندارمەن بىرگە اسكەري ءىس-قيمىل ءجۇرىپ جاتقان ەلدەرگە عانا قازاقستاندىقتاردى الدىرۋ ءۇشىن جىبەرەدى. الىسقا بارماي-اق قويايىق، ۋكرايناعا، گازا سەكتورى مەن يزرايلگە وسىلاي ارنايى رەيستەر جىبەردىك. وڭتۇستىك كورەيا مەن گرۋزيا تۋرالى ايتساق، ونداي قاجەتتىلىك كورىپ تۇرعان جوقپىز. ونداي وتىنىشپەن ەشكىم جۇگىنگەن جوق. ءوتىنىش بولسا، قاراستىرامىز، - دەدى الىبەك باقايەۆ.
