قازاقستان كومىرىن الىستاعى ەلدەرگە ەكسپورتتاۋ 6,5 ەسەگە ءوستى
استانا. KAZINFORM - قازاقستان كومىرىن الىستاعى مەملەكەتتەرگە ەكسپورتتاۋ كولەمى ارتتى. بۇل تۋرالى ق ر ونەركاسىپ جانە قۇرىلىس مينيسترلىگى باسپا ءسوز قىزمەتىنەن ءمالىم بولدى.
«وندىرىلگەن كومىردىڭ جالپى كولەمىندەگى ەكسپورتتىڭ ۇلەسى تاريحي تۇردە 26-28 پايىز شەگىندە. كەيىنگى بەس جىلداعى كومىر ەكسپورتىن تالداي كەلە، ەكسپورتتىق الەۋەتتىڭ پروگرەسسيۆتى سيپاتتا ەكەنى كورىنىپ تۇر. ق ر ۇلتتىق ستاتيستيكا بيۋروسىنىڭ دەرەكتەرى بويىنشا الىس شەت ەلدەرگە تاس كومىر مەن ليگنيت ەكسپورتى 6,5 ەسەگە (1,3 ميلليون توننادان 8,5 ميلليون تونناعا دەيىن) ۇلعايدى. ەڭ الدىمەن، بۇل جاعداي ەۋروپا وداعىنىڭ رەسەي فەدەراتسياسىنا قاتىستى قابىلداعان سانكسيالىق شارالارىنا، ولاردىڭ قازاقستاندىق كومىرگە دەگەن سۇرانىسىنىڭ ارتۋىنا جانە ونىڭ قۇنىنىڭ وسۋىنە بايلانىستى»، - دەلىنگەن مينيسترلىكتىڭ Kazinform اگەنتتىگىنە بەرگەن رەسمي جاۋابىندا.
اتاپ ايتقاندا، الداعى كەزەڭدە كومىردى الىستاعى مەملەكەتتەرگە وتكىزۋ كولەمى تاعى دا ارتۋى مۇمكىن.
«وسىلايشا، ءبىزدىڭ جەر قويناۋىن پايدالانۋشىلاردىڭ ەكسپورتتىق الەۋەتى نەگىزىنەن كومىرگە سۇرانىستىڭ ارتۋىنا بايلانىستى الىس شەتەلدەرگە باعىتتالادى»، - دەپ اتالىپ وتكەن ۆەدومستۆو اقپاراتىندا.
بۇدان بۇرىن حابارلانعانداي، قازاقستان رەسپۋبليكاسىنىڭ وتىن-ەنەرگەتيكالىق كەشەنىن دامىتۋدىڭ 2023-2029-جىلدارعا ارنالعان تۇجىرىمداماسىندا كومىر ءوندىرۋدى جىل سايىن ۇلعايتۋ ەسكەرىلگەن.
