قازاقستان جاز سوڭىنا دەيىن قانت ەكسپورتىنا تىيىم سالادى

بۇگىن، 6-مامىردا ۆيتسە-پرەمەر سەرىك ءجۇمانعاريننىڭ توراعالىعىمەن وتكەن سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا قانت قىزىلشاسىنىڭ جاڭا ءونىمى جينالعانعا دەيىن ىشكى نارىقتى قانتپەن قامتاماسىز ەتۋ ماسەلەلەرى قارالدى. قازىرگى ۋاقىتتا قويمالارداعى قانت قورىنىڭ جانە قازاقستانعا يمپورت كولەمىنىڭ تەڭگەرىمى شامامەن 256 مىڭ توننا، بۇل ەلدىڭ جىلدىق قاجەتتىلىگىنىڭ جارتىسى (500-550 مىڭ توننا).

«بۇگىندە قويمالارداعى قانت پەن شيكى قۇراق قورى 136 مىڭ توننا. 2024-جىلدىڭ 31-تامىزىنا دەيىن كۆوتامەن رەسەيلىك قانتتىڭ 120 مىڭ توننا كولەمىندەگى يمپورتىن قوسقاندا، بۇل شامامەن 256 مىڭ تونناعا دەيىن جەتەدى. سونىمەن قاتار قازاقستاندا 2024 -جىلدىڭ سوڭىنا دەيىن وڭدەۋگە ارنالعان 300 مىڭ توننا شيكى قۇراقتى باجسىز اكەلۋگە كۆوتا بار. ورتا ەسەپپەن ايلىق تۇتىنۋ جازدا 46 مىڭ توننا، سۇرانىس 60 مىڭ تونناعا جەتەدى. قولدانىستاعى قانت قورى جاڭا ونىمگە دەيىن قانتقا دەگەن سۇرانىستى وتەۋگە جەتكىلىكتى»، - دەدى اۋىل شارۋاشىلىعى ۆيتسە-ءمينيسترى ەربول تاسجۇرەكوۆ.

جاقىن ارادا قازاقستاندىق تاراپ رەسەيلىك ارىپتەستەرىمەن قانت جەتكىزۋ كۆوتاسىن جىل سوڭىنا دەيىن تاعى دا 100 مىڭ تونناعا ۇلعايتۋ بويىنشا كەلىسسوزدەر جۇرگىزۋدى جوسپارلاپ وتىر. سونىمەن قاتار قازاقستاندىقتاردى قانتپەن ۇزدىكسىز قامتاماسىز ەتۋ ءۇشىن ۆەدومستۆوارالىق كوميسسيامەن 2024-جىلعى 31-تامىزعا دەيىن قازاقستاننان ءۇشىنشى ەلدەرگە، ونىڭ ىشىندە حالىقارالىق ترانزيتتى قوسپاعاندا، ە ا ە و- عا قاتىسۋشى ەلدەرگە قانت ەكسپورتىنا ۋاقىتشا تىيىم سالۋدى ەنگىزۋ تۋرالى ۇجىمدىق شەشىم قابىلداندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى