قازاقستان حالقىنىڭ سانى 20 ميلليون ادامعا جۋىقتادى
ءبىر جىل ىشىندە ەل تۇرعىندارىنىڭ سانى 1,4 پايىزعا ارتتى. Kazinform بۇل تۋرالى Finprom.kz سايتىنا سىلتەمە جاساپ حابارلايدى.
2023 -جىلدىڭ 1-قىركۇيەگىندەگى جاعداي بويىنشا، قازاقستان حالقىنىڭ سانى 19,9 ميلليون ادامعا جەتتى. بۇل كورسەتكىش بىلتىرعى جىلمەن سالىستىرعاندا 1,41 پايىزعا كوپ.
جىل باستالعاندا حالىق سانى 19,8 ميلليون ادام بولىپ، جىلدىق كورسەتكىش 1,35 پايىزعا جەتكەن. جالپى ەل تۇرعىندارى سانىنىڭ ءوسۋ قارقىنى 1,28-1,49 پايىز شاماسىندا تۇر. 2022 -جىلى عانا العاش رەت حالىق سانى 3,3 پايىزعا وسكەنى بايقالدى.
2023 -جىلدىڭ 1-قىركۇيەگىندەگى جاعداي بويىنشا، تۇرعىن سانى ەڭ كوپ وڭىرلەردىڭ ۇشتىگى: الماتى قالاسى (2,2 ميلليون ادام)، تۇركىستان وبلىسى (2,1 ميلليون ادام) جانە الماتى وبلىسى (1,5 ميلليون ادام). حالىق سانى ەڭ از ايماقتار - ۇلىتاۋ (221,5 مىڭ ادام)، سولتۇستىك قازاقستان (531,7 مىڭ) جانە اباي (608,9 مىڭ ادام) وبلىستارى ەكەن.
سونىمەن قاتار، سولتۇستىك قازاقستان، اباي، جەتىسۋ، شىعىس قازاقستان جانە قوستاناي وبلىستارىندا حالىق سانى ازايعانى بايقالعان.
جىل باسىنداعى كورسەتكىش بويىنشا، ەركەكتەر سانى جىلىنا 1,4 پايىزعا، 9,6 ميلليون ادامعا دەيىن، ال ايەلدەر سانى 1,3 پايىزعا، 10,1 ميلليون ادامعا ارتقان.
جالپى ايەلدەر سانى ەركەكتەردەن 4,9 پايىزعا كوپ.
ەل تۇرعىندارىنىڭ 35,5 پايىزى، ياعني 7 ميلليون ادام - 18 جاسقا تولماعان بالا. 29 جاسقا دەيىنگى كامەلەتكە تولعان جاستار سانى 2,7 ميلليون ادام بولىپ شىقتى.
60-69 جاس ارالىعىنداعى تۇرعىندار - 1,6 ميلليون، 70-79 جاس ارالىعى - 681,6 مىڭ ادام، 80 جاستان اسقان تۇرعىندار سانى - 317,3 مىڭ ادام.
اۆتور
بالنۇر قوجاگەلدى
