قازاقستان حالقىنىڭ نەكەدە تۇرعان ەرلەرى مەن ايەلدەرىنىڭ سانى وسكەن

ۇلتتىق ستاتيستيكا بيۋروسى 2021 -جىلعى حالىق ساناعىنىڭ قورىتىندىسى بويىنشا نەكە جانە وتباسى، سونداي-اق ءۇي شارۋاشىلىقتارى بويىنشا كەزەكتى جيناقتى شىعاردى.

وندا ايماقتار، جىنىس جانە جاس قۇرامى بولىنىسىندەگى كورسەتكىشتەردى، سونداي-اق سوڭعى ەكى ساناق اراسىنداعى ديناميكالىق وزگەرىستەردى كورۋگە بولادى.

نەكەدە تۇرعان ەرلەر مەن ايەلدەردىڭ سانى 2009 -جىلى 6,6 ميلليوننان 2021 -جىلى 8,2 ميلليونعا دەيىن ءوستى

2021 -جىلعى ساناق قورىتىندىسى بويىنشا حالىقتىڭ 60,9 پايىز نەكەدە بولعان، وسىلايشا نەكەدە تۇرعان ازاماتتاردىڭ سانى - 8,2 ميلليون ادام.

ونىڭ ىشىندە 9 پايىز - قايتا نەكە قۇرعاندار.

جالپى حالىقتىڭ 28 پايىز - ەشقاشان ۇيلەنبەگەن، 5,3 پايىز - جەسىر، ال قالعان 5,8 پايىز - اجىراسقاندار.

ءۇي شارۋاشىلىقتارىنىڭ سانى 27,9 پايىز ءوستى

ساناق ناتيجەسى ءۇي شارۋاشىلىقتارى سانىنىڭ 27,9 پايىز وسكەنىن كورسەتتى - 2009 -جىلعى 4,3 ميلليون بىرلىكتەن 2021 -جىلى 5,6 ميلليون بىرلىككە دەيىن.

قالالىق جەرلەردە ءۇي شارۋاشىلىقتارىنىڭ 3,7 ميلليون (66,4 پايىز)، اۋىلدىق جەرلەردە - 1,8 ميلليون (33,6 پايىز) بىرلىگى ەسەپكە الىندى.

قازاقستان بويىنشا ءۇي شارۋاشىلىقتارىنىڭ ورتاشا مولشەرى 3,4 ادامدى قۇرادى.

بۇل رەتتە اۋىلدىق جەردەگى ءۇي شارۋاشىلىقتارىنىڭ ورتاشا مولشەرى قالالىق جەرلەرگە قاراعاندا ارتىق، تيىسىنشە 3,9 جانە 3,1 ادامنان.

ءۇي شارۋاشىلىقتارىنىڭ ەڭ جوعارى ورتاشا مولشەرى ماڭعىستاۋ، اتىراۋ، قىزىلوردا جانە تۇركىستان وبلىستارىندا بايقالدى - 4,3 تەن 5,2 ادامعا دەيىن.

ايتا كەتەيىك، الماتى، شىعىس قازاقستان، قاراعاندى وبلىستارى بويىنشا دەرەكتەر ساناق وتكەن ۋاقىتقا، ياعني ولار بولىنگەنگە دەيىن بەرىلگەن. بۇل رەتتە جاڭادان قۇرىلعان وبلىستارداعى حالىق سانى ساناق دەرەكتەرىن ەسكەرە وتىرىپ قايتا ەسەپتەلگەن جانە stat.gov.kz سايتىندا جاريالانعان.

اۆتور

جانات قاپالبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى