قازاقستان فۋتبولىندا اقشا قالاي ۇرلانعان؟ باس پروكۋراتۋرا مالىمدەمە جاسادى
استانا. KAZINFORM – قازاقستان فۋتبول فەدەراتسياسىنىڭ بۇرىنعى باسشىلىعى كەزىندە جاسالعان زاڭبۇزۋشىلىقتار انىقتالدى.
قازاقستاننىڭ فۋتبول فەدەراتسياسى مەن بىرنەشە فۋتبول كلۋبىنا جۇرگىزىلگەن پروكۋرورلىق تەكسەرىس ناتيجەسىندە باسقارۋداعى تيىمسىزدىك پەن 3 ميلليارد تەڭگە كولەمىندە قارجىلىق زاڭبۇزۋشىلىقتار انىقتالعان.
«ونىڭ قاتارىندا نەگىزسىز سىياقى تولەۋ، ينفراقۇرىلىم نىسانىن سالۋ كەزىندە قاراجاتتى ماقساتسىز پايدالانۋ، سپورتشىلارمەن جاسالعان كۇماندى كەلىسىمدەر جانە سپورتشىلاردى تاماقتاندىرۋعا بولىنگەن قارجىنى جىمقىرۋ دەرەكتەرى بار»، - دەپ جازىلعان حابارلامادا.
فەدەراتسيانىڭ بۇرىنعى باسشىلىعى كەيبىر قىزمەتكەرلەر مەن سپورتشىلارعا 300 ميلليون تەڭگەدەن اسا سومادا نەگىزسىز سىياقى تولەگەن.
فەدەراتسيانىڭ اكىمشىلىك عيماراتى مەن تالعار قالاسىنداعى جاتتىعۋ بازاسىن سالۋ بارىسىندا دا ءىس جۇزىندە ورىندالماعان جۇمىستارعا 350 ميلليون تەڭگەدەن اسا تولەمدەر جاسالعان. 2021-جىلى باستالعان الماتى وبلىسىنداعى بازا قۇرىلىسى توقتاپ تۇر، ال مەردىگەردىڭ شوتتارى بۇعاتتالعان. سونىمەن قاتار، 135 ميلليون تەڭگەگە ستراتەگيالىق قۇجاتتار مەن ستاندارتتاردى ازىرلەۋگە بولىنگەن قاراجاتتىڭ ورىندى جۇمسالۋى دا كۇمان تۋدىرعان. بۇل قۇجاتتاردا ناقتى ىسكە اسىرۋ تەتىكتەرى، ونىڭ ىشىندە جەكە ينۆەستيتسيالاردى تارتۋ جولدارى كورسەتىلمەگەن، ال كلۋبتاردى باسقارۋ ستاندارتى ءىس جۇزىندە ەنگىزىلمەگەن.
«ورداباسى»، «اقتوبە» جانە «جەتىسۋ» فۋتبول كلۋبتارىنداعى تەكسەرىس ناتيجەسىندە دە كەلىسىمشارت سومالارىن اسىرىپ كورسەتۋ، ويىنشىلاردى تومەن باعامەن ساتۋ، جوعارى باعامەن ساتىپ الۋ جانە قاراجات جىمقىرۋ سياقتى ءبىرقاتار ەلەۋلى زاڭبۇزۋشىلىق انىقتالعان.
«سوتالدى تەرگەپ-تەكسەرۋ جۇمىستارى باستالدى. فۋتبول فەدەراتسياسىنىڭ بۇرىنعى باسشىلارىنا قاتىستى قىلمىستىق ءىس تەرگەپ-تەكسەرۋ ءۇشىن قارجىلىق مونيتورينگ اگەنتتىگىنە بەرىلدى»، - دەپ جازىلعان حابارلامادا.
