قازاقستان فرانسيامەن بىرگە اۆياتسيا ماماندارىن دايارلاماق
ەلىمىزدە جىل سايىن اۆياتسيا سالاسىندا 600 مامان جەتىسپەيدى. بۇل تۋرالى ۇكىمەت وتىرىسىندا كولىك ءمينيسترى مارات قارابايەۆ ايتتى، دەپ حابارلايدى Kazinform.
«كادرلار دايارلاۋ ماسەلەسىنە توقتالاتىن بولساق، قازىرگى ۋاقىتتا سالادا 20 مىڭعا جۋىق ادام جۇمىس ىستەيدى. جىل سايىن قوسىمشا كادرلارعا دەگەن قاجەتتىلىك 600 ادامدى قۇرايدى. ەلىمىزدە ورتا ازيا بويىنشا كادرلار دايارلاۋدى جۇزەگە اسىراتىن جالعىز جوعارى وقۋ ورنى جۇمىس ىستەپ تۇر. الايدا، اكادەميا تۇلەكتەرى حالىقارالىق تالاپتارعا سايكەس كەلمەۋ سەبەبىنەن سۇرانىسقا يە ەمەس»، - دەدى مينيستر.
ونىڭ ايتۋىنشا، وسىعان بايلانىستى نەگىزگى اۆياكاسىپورىندار كادرلاردى دايارلاۋدى ءوز بەتىنشە جۇزەگە اسىرۋعا ءماجبۇر.
«كادر تاپشىلىعى ماسەلەسىن شەشۋ جانە ستۋدەنتتەرىمىزدىڭ سۇرانىس دەڭگەيىن ارتتىرۋ ماقساتىندا فرانسيالىق ازاماتتىق اۆياتسيا ۇلتتىق مەكتەبىن ستراتەگيالىق سەرىكتەس رەتىندە تارتا وتىرىپ، EASA ەۋروپالىق ستاندارتتارعا سايكەس كادرلاردى دايارلاۋ پىسىقتالىپ جاتىر»، - دەدى ول.
