قازاقستان عالىمدارىنىڭ ونكولوگياعا قارسى ءدارىسىن شىعارۋ ءۇشىن قانشا اقشا كەرەك

- «National Laboratory Astana» جەكە مەكەمەسىنىڭ اقپاراتىنا سايكەس پرەپاراتتىڭ رەسمي ساۋدا اتاۋى تىركەۋ كەزىندە بەلگىلەنەدى جانە ودان ءارى پايدالانۋ پروتسەسى كەزىندە قولدانىلادى. بۇل پرەپاراتتىڭ پاتەنتتەلمەگەن حالىقارالىق جالپى اتاۋى - «ەريتورب قىشقىلى». كلينيكالىق زەرتتەۋ ساتىسىندا قولدانىلاتىن ادەتتەگى اتاۋى - DVC. ەگەر ق ر دەنساۋلىق ساقتاۋ مينيسترلىگى ارقىلى اتالعان پرەپارات تىركەلگەن جاعدايدا، پاتسيەنتتەردى ەمدەۋ ءۇشىن كلينيكادا قولدانۋعا رۇقسات ەتىلگەنىن بىلدىرەدى. دۇنيەجۇزىلىك دەنساۋلىق ساقتاۋ ۇيىمى ءدارى-دارمەكتەردى تىركەۋمەن اينالىسپايدى (ۆاكسينالار ءۇشىن پاندەميا كەزىندە ەرەكشە جاعداي جاسالدى). قازىرگى ۋاقىتتا كلينيكالىق زەرتتەۋلەردىڭ ءبىرىنشى كەزەڭى (قاۋىپسىزدىك پەن توزىمدىلىكتى باعالاۋ) اياقتالۋعا جاقىن. زەرتتەلەتىن پرەپارات (DVC) جانە مىشياك تريوكسيدىمەن (arsenic trioxide) DVC كومبيناتسياسى قاناعاتتانارلىق تۇردە ءتوزىمدى ەكەندىگى انىقتالدى، - دەپ جازىلعان ۆەدومستۆونىڭ «National Laboratory Astana» جەكە مەكەمەسىمەن بىرلەسىپ ازىرلەگەن جاۋابىندا.

كلينيكالىق سىناقتار بىرنەشە كەزەڭمەن، ءار كەزەڭ بىرنەشە ساتىمەن وتەتىنىن بۇعان دەيىن جازعان ەدىك.

- ودان ءارى كلينيكالىق زەرتتەۋلەردىڭ ءۇشىنشى كەزەڭى جۇرگىزىلۋى كەرەك. قولدانۋدىڭ ماڭىزدى كورسەتكىشتەرىن تاڭداۋ ءۇشىن قاتەرلى ىسىكتىڭ ءارتۇرلى فورمالارى مەن تۇرلەرىندە زەرتتەلەتىن پرەپاراتتىڭ تيىمدىلىگىن پايدالانۋ كوزدەلگەن. وسى ۋاقىتقا دەيىن ستاندارتتى تەراپيانىڭ اسەرى بولماعان كەزدە قاتەرلى ىسىكتىڭ 4-ساتىسىنداعى ناۋقاستاردىڭ جاعدايىنىڭ تۇراقتى ەكەندىگى تۋرالى ايتۋعا بولادى.

قازىرگى ۋاقىتتا زەرتتەلەتىن DVC دارىلىك پرەپاراتى بارلىق قاجەتتى جاعدايلارى بار جانە GMP بويىنشا اتتەستاتتالعان وندىرىستىك الاڭىندا وندىرىلەدى. حالىقارالىق ادەبيەتتەردە وزىق فارماتسيەۆتيكالىق كومپانيالاردىڭ تاجىريبەسىنە سۇيەنە وتىرىپ، تەراپيەۆتىك سالاعا بايلانىستى جاڭا پرەپاراتتى ازىرلەۋ قۇنى 314 ميلليوننان 4,46 ميلليارد دوللارعا دەيىن دەپ ەسەپتەلەدى. DVC كورسەتكىش كەڭىستىگىنىڭ ايقىن بولماعاندىعىن ەسكەرە وتىرىپ، ينۆەستيتسيالىق قاراجاتتىڭ وتەلۋ مەرزىمىن ەسەپتەۋ قيىن، - دەلىنگەن جاۋاپتا.

قازىرگى تاڭدا پرەپارات كولورەكتالدى قاتەرلى ىسىككە قولدانىلادى.

- بۇل - قاتەرلى ىسىكتىڭ ەڭ كوپ تارالعان تۇرلەرىنىڭ ءبىرى. قازاقستاندا جىل سايىن كولورەكتالدى قاتەرلى ىسىكتىڭ 3000 نان استام جاڭا جاعدايى انىقتالادى. ونكولوگيالىق اۋرۋلاردىڭ قۇرىلىمىندا كولورەكتالدى قاتەرلى ىسىك 4-ورىندا. الايدا، كلينيكالىق زەرتتەۋلەردىڭ ءۇشىنشى كەزەڭى اياقتالعاننان كەيىن تيىمدىلىك سپەكترى انىقتالادى جانە سول كەزدە DVC قولدانۋدىڭ كەڭىستىگى مەن ينۆەستيتسيالانعان قاراجاتتىڭ وتەلۋ ۋاقىتىن دالىرەك كورسەتۋگە بولادى، - دەپ جازادى ماماندار.

قازاقستاندىق عالىمداردىڭ عىلىمي ناتيجەلەرى الەمدىك عىلىمي قوعامداستىقتا مىنا جاريالانىمدار ارقىلى ۇسىنىلعان.

- دايەكسوزگە سۇيەنسەك، DVC زەرتتەۋ ناتيجەلەرىنە جوعارى قىزىعۋشىلىق بار. وسى جوبانى كوممەرتسيالاندىرۋ - كلينيكالىق زەرتتەۋدىڭ قورىتىندى ناتيجەلەرىن العاننان كەيىن بولاتىندىعى زاڭدىلىق. پرەپارات كوكتامىر ىشىنە ەنگىزۋگە ارنالعان ەرىتىندى تۇرىندە قول جەتىمدى بولادى. كلينيكالىق زەرتتەۋلەر اياقتالعانعا جانە ناتيجەلەر جاريالانعانعا دەيىن شەتەلدىك ينۆەستورلاردىڭ قىزىعۋشىلىعىنا ۇمىتتەنۋ قيىنداۋ بولىپ وتىر، - دەپ جازىلعان ۆەدومستۆو مالىمەتىندە.

ەسكە سالساق، پرەمەر-مينيستر ولجاس بەكتەنوۆ ۇكىمەتتىڭ كەڭەيتىلگەن وتىرىسىندا پرەپاراتتىڭ جىل سوڭىنا دەيىن تىركەۋدەن وتەتىنىن ءمالىم ەتكەن بولاتىن.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى