قازاقستان بىتىمگەرشىلىك كۇشتەرى سيرياعا العاشقىلاردىڭ ءبىرى بولىپ جەتەدى
استانا. KAZINFORM - بىرىككەن ۇلتتار ۇيىمى كۇشتەرىنىڭ ءبولىنۋدى باقىلاۋ ميسسياسىنىڭ قولباسشىلىعى (СООННР - UNDOF) گولان بيىكتىكتەرىندە ق ر قارۋلى كۇشتەرىنىڭ ۇلتتىق بىتىمگەرشىلىك كونتينگەنتىن جەتكىزۋ جانە ورنالاستىرۋ قىزمەتىن جوعارى باعالادى.
قازاقستاننىڭ بىتىمگەرشىلىك كونتينگەنتى СООННР باسشىلىق قۇرامىنان جانە ءارتۇرلى ەلدەردىڭ قاتارداعى اسكەري قىزمەتشىلەرىنەن جەكە قۇرامدى ءوز تەحنيكاسىمەن، قارۋ-جاراعىمەن جانە ماتەريالدىق-تەحنيكالىق قورىمەن جىلدام كوشىرگەنى ءۇشىن جوعارى باعاعا يە بولدى.
СООННР قولباسشىلىعى اتاپ وتكەندەي، ۋاقىتشا جانە تۇراقتى ورنالاسۋ ورنىندا جەدەل جەتكىزۋ ەڭ قىسقا مەرزىمدە جۇزەگە اسىرىلعان.
СООННР ميسسياسى شتابىنىڭ باستىعى، گانا قارۋلى كۇشتەرىنىڭ پولكوۆنيگى ۋيليام نورتيدىڭ ايتۋىنشا، سيريا اۋماعىنا تولىق قۇرامدا جىبەرۋ تۋرالى شەشىم قابىلدانعان ساتتەن باستاپ، قازاقستاندىق كونتينگەنتتى بارلىق تەحنيكاسىمەن بىرگە كوشىرۋ ب ۇ ۇ بىتىمگەرشىلىك كۇشتەرىندەگى قىزمەتى تاريحىنداعى ەڭ جىلدام جانە ۇيىمداسقان جۇمىس بولدى.
بۇعان دەيىن قوسىمشا قاۋىپسىزدىك ماقساتىندا سوننر ايماعىندا بولعان شەتەلدىك كونتينگەنتتەر ءوز كۇشتەرىن ليۆان اۋماعى ارقىلى تاسىمالدايتىن، بۇل سيرياعا تاسىمالداۋ مىندەتىن قيىنداتتى جانە تيىمدىلىككە دە ايتارلىقتاي اسەر ەتتى. بۇل رەتتە وڭىردە ون جىلدىق تاجىريبەسى بار يرلانديالىق بىتىمگەرشىلىك كۇشتەر بۇرىنعى مارشرۋت بويىنشا ءوز ەلىنە قايتادى.
پولكوۆنيك ۋ. نورتي ۋاقىتشا СООННР ميسسياسىنىڭ قولباسشىسى قىزمەتىن اتقارۋدا. ول 1993-جىلدان بەرى قارۋلى كۇشتەردە قىزمەت ەتەدى.
«ق ر قارۋلى كۇشتەرى جەكە قۇرام مەن تەحنيكانى تىكەلەي سيرياعا كاسىبي، قاۋىپسىز جانە جەدەل تاسىمالدادى، بۇل گولان جوتاسىنا تاسىمالداۋ كەزىندەگى قارجىلىق جانە ۋاقىتشا شىعىنداردى ايتارلىقتاي قىسقارتتى. بۇل قازاقستاندىق بىتىمگەرشىلىك روتانىڭ جەكە قۇرامىنىڭ كاسىبيلىگىنىڭ، ءبىلىمى مەن ءتارتىبىنىڭ جوعارى دەڭگەيىن كورسەتەدى. قىزمەتتى ۇيىمداستىرۋداعى جەدەلدىگى مەن تيىمدىلىگى ءۇشىن قزاقستاننىڭ قورعانىس مينيسترلىگىنىڭ قولباسشىلىعى مەن سىرتقى ىستەر مينيسترلىگىنىڭ قۇرىلىمدىق بولىمشەلەرىنە العىس بىلدىرەمىز»، - دەپ اتاپ ءوتتى СООННР قولباسشىلىعى.
سونىمەن بىرگە، سيريا اۋماعىنداعى جەرگىلىكتى حالىق قازاقستاندىق بىتىمگەرلەردى جىلى قارسى العان. جەرگىلىكتى تۇرعىندار قازاقستاننىڭ اسكەري كۇشتەرى تاياۋ شىعىستىڭ جەكەلەگەن مەملەكەتتەرىندە ءتارتىپتى قامتاماسىز ەتۋ سىندى ماڭىزدى جۇمىس ءۇشىن كەلگەنىن تۇسىنەدى.
