قازاقستان ازاماتى «سەۋلدىڭ قۇرمەتتى تۇرعىنى» اتاعىنا يە بولدى
استانا. KAZINFORM - سەۋل قالاسى اكىمدىگىندە «سەۋلدىڭ قۇرمەتتى تۇرعىنى» اتاعىن تابىستاۋ سالتاناتتى ءراسىمى ءوتتى. بيىل بۇل جوعارى ماراپاتقا قازاقستان ازاماتى، قازاقستان رەسپۋبليكاسىنىڭ كورەيا رەسپۋبليكاسىنداعى ەلشىلىگىنىڭ قىزمەتكەرى رۋسلان قايرامبايەۆ يە بولدى.
بۇل اتاققا 1958-جىلى تاعايىندالعاننان بەرى الەمنىڭ 100 ەلىنەن بارلىعى 933 ادام يە بولعان. اتاق سەۋلدىڭ دامۋىنا ايتارلىقتاي ۇلەس قوسقان شەتەل ازاماتتارىنا بەرىلەدى. بيىل بۇل اتاق حالىقارالىق ىنتىماقتاستىقتى نىعايتۋعا جانە قالانىڭ وركەندەۋىنە ۇلەس قوسقان 16 لاۋرەاتقا تابىستالدى.
سەۋل اكىمىنىڭ ءبىرىنشى ورىنباسارى كيم سانگ حان ماراپات يەلەرىنىڭ ەلەۋلى جەتىستىكتەرىن اتاپ ءوتىپ، ولاردىڭ جەمىستى ەڭبەگى ءۇشىن العىسىن ءبىلدىرىپ، حالىقتار مەن مادەنيەتتەردىڭ جاقىنداسۋىنىڭ ماڭىزدىلىعىن ەرەكشە اتاپ ءوتتى.
رۋسلان قايرامبايەۆ وتكەن جىلدىڭ جەلتوقسان ايىندا جاساعان ەرلىگى ءۇشىن جوعارى باعاعا يە بولدى. ول جەر استى اۆتوتۇراعىنان شىعىپ كەلە جاتقان جانىپ جاتقان اۆتوكولىكتى ءورت سوندىرۋشىلەر كەلگەنگە دەيىن ءسوندىرىپ، جالىننىڭ تارالۋىنىڭ الدىن الىپ، ادامداردىڭ ءومىرىن ساقتاپ قالدى.
بارلىق لاۋرەاتتار اتىنان ءسوز سويلەگەن قازاق ديپلوماتى سەۋل قالاسىنىڭ اكىمدىگىنە كورسەتكەن قۇرمەتى ءۇشىن العىس ايتىپ، ءوز ارەكەتىن ەرلىك دەپ سانامايتىنىن جەتكىزدى: «مەنىڭ ورنىمدا بولعان كەز كەلگەن ادام ءدال سولاي جاسار ەدى». سونداي-اق، ول بۇل ماراپات قازاقستان مەن كورەيا اراسىنداعى دوستىق پەن ءوزارا تۇسىنىستىكتى نىعايتۋعا ىقپال ەتەدى دەگەن سەنىمىن ءبىلدىردى.
بۇل ماراپات قازاقستان مەن وڭتۇستىك كورەيا اراسىنداعى ەكىجاقتى بايلانىستى نىعايتۋ مەن حالىقارالىق قارىم- قاتىناستاردى دامىتۋداعى ىنتىماقتاستىقتىڭ ماڭىزدىلىعىن ايقىندايدى.
